Mawkyrwat, Nailur 29
Ka Synjuk ki Seng Samla Shnong Shiliang Um Zone ryngkat ka Hynñiewtrep Youths’ Council (HYC) Maw-thawpdah Area Unit hadien ka jingïoh jingujor na ki paidbah, ha kine ki khyndiat sngi ba la dep ki la leit ban hiar jurip ïa ka Rilang College kaba don ha ka shnong Mawsaw ha South West Khasi Hills District. Ha kane ka jingjurip ki la lap ba kane ka shlem ai jinghikai ka bym pat treikam ka la kylla long pynban ka ktem ki kam sniew kum ka ïa khalai, dih kyiad bad kiwei kiwei.
Kum ban shu kdew ïa katei ka kolej la tei naduh u snem 2018-19 lyngba ka skhim SRWP ha ka mang tyngka kaba T.10,00000 lak. Ka jingtei ïa katei ka kolej ka la pynkmen shi kat dei ïa ki paidbah bad ki samla pule kane ka dong ka thaiñ kiba la angnud la slem ban don noh la ka jong ka kolej ban pynsuk ïa ki khun samla kiba thrang shisha ban pyndep ïa ki jingpule bad ïa kito ki bym kot bor ban phah pule sha kiwei ki jaka kum ha Mawkyrwat, Nongstoiñ bad sha sor Shillong.
Na ka liang u Bah Wallambok Nongsiej bad Chairman SSSS Shillong Um Zone lem bad u samla Wellman Wanniang, Secretary HYC Mawthawpdah Area Unit haba kren sha ki lad pathai khubor hadien ka jingjurip ki la pynpaw ïa ka jingsngewdiaw kaba khraw bad buh jingkylli ba balei kane ka jaka pule haduh mynta ka don tang ka shynrong suda ym don tiar eiei, ki samla pule ne ki nonghikai hynrei ka la kylla ïing jah bad ka jaka jong ki kam sniew.
Kumta na ka liang ka Synjuk lem bad ka HYC ka buh ka jingkyrpad ïa kiba dei khmih bad kiba wanrah ïa katei ka kolej ba kin pyntreikam ïa ka khnang ba kan long shisha ka jingmyntoi ïa ki khun samla ka dong ka thaiñ shiliang um.
Ki la ïathuh ruh ba hi kine ki snem ba la dep ka don ka jingkhot pynrung kyrteng ïa ki samla pule bad ki byrta (advertisement) na ka bynta ki kam nonghikai. Hynrei kaba sngewsih haduh mynta kane ka kolej kam shym la treikam satia bad ki la bynrap ruh ba ïa kito kiba wanrah ïa kane ka kolej ba kim dei ba shim kabu ne leh politik ïa kane ka bynta.
