Mawkyrwat, Nailur 29
Ka kynhun jong hati khlaw ha ka miet jong ka 28 tarik u Nailur 2024 ki la wan ban thombor biang ïa ki jingthung jingtep bad ïa ki ïing ki sem ha ka shnong 15 Mer kaba hap hapoh Ranikor Block ha South West Khasi Hills District.
Katkum ki tyllong khubor ba la ïoh lum la ïathuh ba ki mar rep bad ki jingthung jingtep kiba la shah pynjulor ha ki hati ki long ki dieng kwai, sohtrun, dieng kait bad kawei ka ïing bad donbok ha katei ka jingjia ym shym la don ba mynsaw.
Katkum ka kyrwoh khubor na ki Nongïalam ka Ranikor Area Farmers Association (RAFA) u Bah Micheal Lyngdoh, President bad Kyrmen K Ryja, Secretary ki la ïathuh ba naduh ki snem ba la dep, ka seng ka la leit ban ujor ha ki bor ba dei khmih jong ka tnat Wildlife kumjuh ruh ha ophis DC Mawkyrwat ha kaba ïadei bad ka jingwan thombor ki hati khlaw hynrei na ka liang ki bor ophis ki la shu kut tang ha ki jingkular bad ki khlem leh eiei.
Ki la ïathuh ruh ba na ka liang ka tnat Wildlife ka la wan jngoh bunsien bad ki la kular ruh ban ai jingïarap ïa ki nongrep ha kaba na ka liang ka RAFA ka la ai ruh ïa ki kot ki sla jong ki nongrep hynrei kane ruh kam shem seisoh eiei ruh em.
Shuh shuh ki la ïathuh ruh ba ha u snem ba la dep ka RAFA ka la pynlong ïa ki jingïalang paidbah bad la shim ruh ïa ka rai ban siat ïap noh ïa kine ki mrad hynrei tang shi sngi, ar sngi na ka liang ki bor ba dei khmih ki la kyrpad ban nym leh kumta bad ki la kular ban shimkhia, hynrei kane ruh khlem poi shaei -shaei.
Ki la pynpaw ruh ba ka long kaei-kaei kaba sngewsih ïa ki paid nongrep ba kat u Myntri Rangbah ka jylla u Conrad Sangma, haba u MLA ka Ranikor u la pynsngew ïa kane ka mat ha ïingdorbar thawaiñ hynrei u ong pynban ban ïa sahlang bad briew bad mrad, kane ka jingkren jong u, ka mut ba u kheiñ ïa ki nongrep jong ka thaiñ Ranikor kum ki mrad.
Kumta ka RAFA mynta ka khot ïa u Myntri Rangbah ka jylla ba sngewbha ban wan dalade bad wan sah lang bad kine ki hati khlaw khnang ba un sngewthuh katno ka jingeh, katne ka jingpynjot jong ki hati khlaw ïa ki ïing ki sem ki mar rep mar riang, ki dieng ki siej bad pynher syrngiew ïa ki briew.
Ka seng ka la byrngem ruh ba lada kan dang ïai bteng ba kine ki hati ki dang wan pynjot, kim banse ban lum biang ïa ki paid nongrep ban shim biang da kiwei ki rai ba kham tyngeh.
