Shillong, Nailur 29
U MDC ka BJP na Tura, u Bernard N. Marak u la phah shithi sha u Myntri Rangbah ka Jylla, u Conrad K. Sangma halor ka jingkyrduh kam bad ka jingthaw ïa 5 lak tylli ki kam na bynta ki samla ka Jylla kaba u (Sangma) la kular ha ka por ilekshon.
“Nga kwah ban kyrpad ïa ka Sorkar jong phi haba ïadei bad ki sienjam kiba la shim ban pynurlong ïa ki kular kiba phi la khlei ha ka por ilekshon ha ryngkat ka jingkular ïa 5,00,000 tylli ki kam sha ki samla,” ong u Marak ha ka shithi ba la phah sha u Myntri Rangbah ha ka Sngi U Blei.
U la ong ruh ba katei ka jingkular ka ïaineh sah kum ka jingkyrmen ha ki samla ka Jylla kiba ïaksaid na bynta ka kam ka jam bad baroh ki ngeit ba kum u Myntri Rangbah ka Jylla ka long kaba lah ban kdup ïa 5,00,000 ngut ki samla da kaba ai ïa ka kam kaba skhem bad neh sha ki, naba mynta ki la don ïa ka jingbun paid.
“Ki samla ki la jied ïa ka seng jong phi da ka jingkyrmen bad jingkhmih lynti, hynrei imat ka don ka jingduh jingkyrmen hapdeng ki samla khamtam kiba la nang la stad – kiba hadien ka jingbteng ïa ki jingpule ba shajrong jong ki, ki sah khlem kam khlem jam bad ka jingpyrshang jong ki ban ïoh ïa ka jingim kaba kham bha i kumba ka long ka jingïaleh kaba khlem jingkut pyrshah ïa kiba riewspah bad kiba don ha ka bor,” ong u Marak.
Halor ka jingjied ba dang shen ïa ki nos, Home Guard bad kiwei-kiwei ki kam, u la ong ba i kumba ka don ka jingbym shai ha ka rukom jied ïa kaba la kdew da katto-katne ngut ki samla.
“Nga ai jingmut ba dei ban pynlong ïa ka rukom jied kaba hok khnang ba kan ym don ka jingshah pynduh ïa ki kyrtong kiba dei hok bad kan ym don kano-kano jingleh bym hok ïa ki nongthep kam kiba dei hok. Nga la ïoh ki jingujor bad ki jingpynsngew na kito kiba la thep kam naba ki tieng ba ka don ka jingleh bym hok hangno-re-hangno. Lait na kito kiba thep mynta, kito kiba la don lypa ruh ki la pynpaw ïa ki jingsngewkhia jong ki,” u la ong.
Na ka liang u MDC u la ïathuh ruh ba ka Sorkar kam shym la shimkhia haba ïadei bad ki jingsiew jong ki nongtrei Asha, Aganwadi, ki nongmihkhmat shnong jong ka MSSAT, ki nonghikai Adhoc bad Sorkar, ki nongtrei ka koit ka khiah (ha ki Civil Hospital, CHC, PHC, HC), ki ‘Muster Roll’ kiba trei ha kiba bun tylli ki tnad treikam, ki Home Guard, ki nongshet jingbam shiteng sngi nalor kiwei-kiwei.
Shuh shuh u Marak haba kyrpad ïa u Myntri Rangbah ban khmih lem ïa kitei ki jingsngewkhia, u la bynrap, “Lada donkam kano-kano ka jingïarap na ka liang jong ngi ban pynbeit ïa ki jingeh ba la kdew bad ban ïaid shakhmat bad ka Jylla kaba shaniah ha lade bad ban pynbna da ka jingsngew sarong ïa ka Jylla jong ngi hapoh ka ‘Viksit Bharat’, ngin da sngewtynnad eh ban ïarap ïa ka sienjam jong phi ban thaw 5,00,000 tylli ki kam na bynta ki samla ka Jylla kaba lah ban pynkylla ïa ka ‘Graph’ jong ka Jylla.”
