Imphal, Nailur 29 (UNI)
Ki suba lehnoh Kuki ha ka Sngi Thohdieng ki la rahbor ïa 3 ngut ki samla katba ki dang ïaid lynti ban leit ïashim bynta ha ka jingkhot thung kam shipai jong ka SSC GD ha New Keithelmanbi.
Hadien kane, ka la don ka jingwad kaba jur bad la ïoh pyllait noh ïa u Johnson Singh na Thoubal Khekman Maning Leikai. Ki 2 ngut kiwei pat ki samla ba la pynithuh kum u Oinam Thoithoi Singh bad u Thokchom Thoithoiba na Thoubal ki dang jah rngai haduh mynta.
Kitei ki 3 ngut kiba dang leit sha ka Recruitment Centre ki la kum leit rung bakla ha kawei ka shnong ba shong ba sah ki Kuki.
Palat 31 ngut ki briew ba kynthup ïa ki khynnah kiba la rung sha ki thaiñ jong ki Kuki ki dang jah rngai ha Manipur hadien ba ka jingïakynad ka la sdang ha ka 3 tarik Jymmang, 2023.
Ha kajuh ka por, la pynlong ïa ka jingïalang paidbah ha ka Sngi Saitjaiñ bad la rai ban thaw ïa ka Joint Action Committee (JAC). Na ka liang ka komiti hadien kane, ka la aiti ïa ka dorkhast sha u Deputy Commissioner ka Thoubal District ban pynllait im ïa kitei ki 2 ngut ki samla.
Ha kawei ka liang, ki suba lehnoh kieng atiar Kuki ki la thombor ïa ka Mongbung Meitei ha Jiribam ha ka Sngi Saitjaiñ. Hashuwa, uwei u pulit CRPF u la shah siat ïap ha ki lehnoh Kuki lyngba ka ‘sniper’ bad uwei u briew uba thiah ha la ïingsah ruh u la shah pynïap.
Ki paid nongshong shnong ka Manipur ki pynlut por ïa ka sngi da kaba khmied sha suiñ ha ryngkat ka jinghusiar naba la ïoh jingtip ba kumba 900 ngut ki lehnoh kieng atiar Kuki na Myanmar kiba la poi ha Manipur ki dang pyrkhat ban ïaid shakhmat bad ka jingthombor kaba khraw.
Na ka liang u Security Advisor, u Kuldiep Singh, u la kyrpad ïa ki paidbah naba ym pat pyntikna ïa katei ka jingtip bad ka jingap pahara ka ïai bteng.
