Shillong, Nailur 29
Ka Hima Nongspung ka la ther tyngeh ïa u Deputy Chief Executive Member (Dy CEM) ka Khasi Hills Autonomous District Council (KHADC), Bah P. N. Syiem halor ka jingshahweng u Pa’iem Petrick Syiemïong kum u Syiem bapura bad ha ka jaka jong u la thung da u Syiem ba shipor.
Haba ïakren bad ki nongthoh khubor ha Shillong Press Club ha ka Sngi Saitjaiñ, u Pa’iem Petrick u la ong ba ka jingweng ïa u kum u Syiem ka dei ka bym don nongrim bad u la kynnoh ïa u Bah PN Syiem kum u Deputy CEM uba peit ïa ka tnat Elaka jong ka KHADC.
U la ong ba u la shahweng namar ki daw kiba khlem nongrim tang ban ïoh thung da uba peit shipor ïa ka jingsynshar jong ka Hima.
“Kiba ujor kim dei satia tang ki dkhot jong ka Dorbar Hima lane ki Bakhraw lane na ka lur Syiemïong, hynrei ka jingujor ka wan pynban na ki khynnah surok ne ki nongap masi ap blang,” la kynthoh tyngeh u Pa’iem Petrick.
U la ong ba ki kynnoh ïa u halor ka kam Sordar ha Mawkynroh hynrei kam don satia ka kynrum-kynram bad na ka liang ka Hima ka la pyndep ïa ki kam haduh ban da ïoh da u Sordar bapura ha ryngkat ka jingsynran lang ki briew ka KHADC.
Hynrei ka jingkynnoh ka dei tang ka jingleh donbor u Bah PN Syiem kum u Deputy CEM tang ban weng ïa u kum u Syiem bapura uba la shahjied.
Nalor kane, u la ong sa kiwei ki jingkynnoh kiba khlem nongrim ki dei halor ki kam shnong ha Mawsniang bad Laitnongrem hynrei ka jingshisha ka long ba ha kine ki shnong ka Hima ka la pynbeit bad la lah ban wanrah Rangbah Shnong bapura.
“Namarkata, kine ki jingkynnoh baroh ki dei kiba khlem nongrim ha kaba ka KHADC lyngba u Bah PN Syiem ka la pdiang tang ban weng noh ïa u kum u Syiem,” la ong u Pa’iem Petrick uba la pynrem jur ïa ka jingleh ka KHADC khamtam eh ïa u Dy CEM.
U Pa’iem Petrick u la shahweng kum u Syiem ka Hima Nongspung ha ka 10 tarik Nailur, 2024.
Na ka liang ki nongkitkam ka Hima Nongspung ruh ki la pynrem jur ïa ka KHADC kaba dei ban peit bad nang pynjanai ïa ka synshar ka khadar ki Hima bad ki Raid hynrei ka lapmiet ban lehkai ïa ka riti ka dustur bad ka rukom synshar. Ki dawa ruh ban wanrah biang ïa u Pa’iem Petrick Syiemïong kum u Syiem.
Kumta ki la ong ba ka Dorbar Hima kan nym ailad ïa u Bah PN Syiem ban shu leh donbor bad ka rukom synshar ka Hima namar ba u Syiem ka Hima Nongspung u dei uba la jied pura da ka kur Syiemïong bad pynskhem lang da ki Lyngdoh bad ki Bakhraw jong ka Hima hynrei la leh donbor pynban da ka KHADC tang ban ïoh thung shipor da uwei pat u briew.
Kumta, namarba kine ki jingleh ka KHADC kim don nongrim ban weng ïa u, la mudui ïa kane ka kam sha Ïingbishar Meghalaya High Court. Ym tang kane, yn sa lum ruh da ka Dorbar Hima ban pynrem ïa ka jingleh donbor u Bah PN Syiem, la ong u Joint Secretary ka Hima Nongspung, u Bah Wanbok Rani.
Na ka liang u Bah Manason Doloi, uba dei u Executive Member ka Hima, u la ong ba naduh ba shimti biang u Pa’iem Petrick, ki jaka ha khappu ka Meghalaya bad Assam ruh ki la kham ïaid beit ïaid ryntih bad dei une u Syiem uba shimkhia ruh ban leit peit ïa ki jaka bad ki shnong kiba hap hapoh ka Hima khamtam haba don kane ka jingpynbeit pud bad ka Assam.
U Bah Doloi u la ong ba ki shnong ha khappud bad ka Assam kum ka Baklapara, Hawla, Lyngkhong, Jimbrigan, Bernongsai, Aborit, Balakhawa, Ranibari, Bilpara, Patkang, Halhel kiba sakma ha ki por ba la leit, ki don hapdeng ka jingshngaiñ lyngba ka jingshimkhia ka Hima.
U Bah Doloi u la ong ba kane ka jingleh ka KHADC ban weng noh ïa u Syiem bapura ka long ka jingma ïa ki jaka jong ka Hima bad ka don eiei shalyndet namarba ka KHADC kaba dei ban peit ban khmih ïa ki jaka puta bad u pud u sam, ka kylla long pynban ka nongpynkulmar da kaba weng noh ïa u Syiem uba treikam bad uba shimkhia ïa ki kam jong ka Hima.
