Jowai, Nailur 30
U MLA ka Amlarem bad Chief Adviser ka Sorkar Jylla u Bah Lahkmen Rymbui ha ka 30 tarik Nailur u la plie ïa ka jingtei kaba thymmai jong ka skul Pdengkarong Govt. Lower Primary School ha ka jingïalang kaba iphuh iphieng kaba la long ha phyllaw jong ka skul.
Ïa kane ka ïingskul bathymmai kaba don 7 kamra, la tei hapoh ka Mission Education Phase II ha ka jinglut kaba T.44,97,448.
U kongsan Bah Lahkmen ha ka jingkren u la pyrto ïa ki nonghikai, ki kmie ki kpa bad ki nongshong shnong na ka bynta ka jingtrei shitom ka jong ki kat haduh ba kila ïoh ïa kane ka ïingskul kaba thymmai.
U kyrmen ruh ba lyngba ka jingplie ïa kane ka ïingskul kaba thymmai kan pynïoh ïa ka pule puthi kaba paka bad ka jinghikai kaba janai na ka bynta ki khynnah kane ka skul.
Hapoh ka 7-Amlarem Constituency la don kumba 39 tylli ki ïingskul kiba la lah ban shna hapoh ki 5 snem kiba la dep bad dang don ruh kiba dangïaid ka jingtrei, la pyntip u Bah Lahkmen bad bynrap ba dang bun shuh kiwei kiwei kiba dang dei ban leh kum shibynta ban kyntiew shuh shuh ïa ki skul bad na ka bynta kata donkam ka jingïatreilang jong baroh kynthup ruh ïa ki tnat treikam ka sorkar.
Haba kyntu ïa ki khynnah skul kumjuh ïa ki khun samla jong ka shnong, u Bah Lahkmen u la pynshlur ban shim kaba bha tam ha ka jingim ka jong ki, da kaba ban jur ruh ban kiar raimaw raidieng na ka jingsniew ba saphriang lyngba ki jait jingdih ba har rukom.
Shuh shuh haba pynshlur pat ïa ki samla ban ïeng ha la ki jong ki kjat khlem da shaniah ïa ki kam sorkar, u Bah Lahkmen u la ong, ka kam sorkar kam dei shuh kaba byllai hynrei ka jingnang jingstad bad ka sap ka phong kaba phi don, ka plie ïa ka jingmut jingpyrkhat ban wad ki lad ki lynti ban lah ban ïeng hala ki jong ki kjat.
U la kyntu ruh ïa ki kmie ki kpa ba kin ïatreilang bad ki nonghikai khnang ba ka lawei jong ki khynnah kan long kaba phyrnai.
Ïa ka jingïalang plie la pynïaid da u Bah Kolmen Pohshna, Waheh Shnong ka Pdengkarong, bad la ïoh ka jingkren lyngkot na u Block Development Officer (BDO) ka Amlarem Bah G Mylliem, SDSEO Amlarem Bah C Lamin, MDC barim Bah Lamdibok Sumer, kumjuh na u Head Teacher Bah Silverstar Sumer nalor kiwei kiwei.
La pynphuh pynphieng ïa ka jingïalang da ki jingrwai jingshad ba la shim bynta da ki khynnah skul, ki samla ka shnong bad na ki kynhun SHG ha ka jingdonlang ki nonghikai, ki kmie ki kpa, ki nongïalam shnong nalor kiwei kiwei.
