Shillong, Nailur 30
Namar ka jingrem ka bai thep kam lane ka ‘application fee’ na ka bynta ka kam ‘Lower Division Assistant Cum Computer Operator’ katkum ka jingpynbna ba la pynmih ha ka 20 tarik u Nailur 2024, na ka liang ka Hynñiewtrep National Youth Movement (HNY M) ka la phah da ka jingthoh sha u Director ka Meghalaya Board Of School Education (MBOSE) halor kane ka bai thep kam.
Katkum ka jingpynbna ba la pynmih, ka bai thep kam na ka bynta ka ‘Lower Division Assistant Cum Computer Operator’ hapoh ka MBOSE kiba lait haduh 24 tylli, ka long T. 750 na ka bynta ki ‘General Category’ katba T. 500 ka dei na ka bynta ki Scheduled Caste (SC), Scheduled Tribe (ST) bad ïa ki Other Backward Class (OBC).
Haba kren sha ki lad pathai khubor ha ka 30 tarik u Nailur 2024, u Vice-President ka HNYM, u Bah Marshall Nonglait u la ong ba hadien ka jingwan ud-wan nam jong ki samla ha ka seng halor ka jingrem eh shaba palat jong ka bai thep kam bad na ka liang ka seng ruh ka la pynpaw ba ka dap da ka jingsngewkhia halor kane.
U Bah Nonglait u la ïathuh ba katkum ka jingpynsngew kaba la pynsngew na u Director ka MBOSE, ka jingremdor ka bai thep kam ka dei namar ba ki hap ban phah leh ïa ki jingkylli shabar jong ka Jylla khnang ba kan don ka jingkhuid-jingsuba ha kaba ïadei bad ka thungkam-thungjam ïa ki samla.
U Bah Nonglait u la ïathuh ruh ba na ka liang ka seng ka la buh jingkylli ïa utei u Director na kaei ka daw ym lah ban pynlong ïa ka eksamin ban thungkam-thungjam lyngba ka Meghalaya Public Service Commission (MPSC) kumba la leh da kiwei ki tnad treikam ka Sorkar Jylla, utei u Director u la ong ba namar ba ki don shibun ki jyrwit-jyrwat dang shen ha ka rukom thungkam-thungjam lyngba ka MPSC, kumta na ka liang ka Sorkar Jylla ka la ailad ïa 3 tylli ki tnad treikam jong ka Sorkar kiba kynthup ïa ka tnad jong ka koit ka khiah, ka tnad pulit bad ka tnad pule-puthi ka Jylla ba ki lah ban pynlong ïa kino-kino ki eksamin thungkam kiba ïadei bad ki kam hapoh ka Jylla.
“Hynrei na ka liang ka seng, ngi ïai ban bad ïai kyntu bad dawa ba la kumno-kumno ha kaba ïadei bad kane ka bai thep kam, ki dei ban pynduna dor namar ka la long shaba palat haduh T.500”, ong u Bah Nonglait.
Shuh-shuh u la ong ba nalor ba ka Jylla ka la dei lypa ka Jylla kaba kyrduh kam-kyrduh jam bad lada ka rem sa ka bai thep kam-thep jam ïa ki samla, kane kan ktah shikatdei eh ïa ki samla.
“Ka long kaei-kaei kaba ktah ïa ki samla kiba khlem kam-khlem jam bad ha kaba kut hi kan ktah ïa ki samla”, ong u Bah Nonglait.
Kumta, na ka liang ka seng ka la kyntu ïa utei u Director ba un leh eiei bad ïakren bad ki bor ba halor ba kin kham pynduna ïa ka dor bai thep kam khnang ba ki khun samla ki bym donkam-donjam baroh kin ïoh ïa ka lad ban thep lem ïa kane ka kam kaba thylli.
