Shillong, Nailur 30
Ka Jaiñtia Students’ Union (JSU) bad ka Khasi Students’ Union (KSU) ki la pynpaw ka jingsngewkhia halor ka jingleh thurmur jong ka Sorkar ha kaba ïadei bad ka rukom pynmih ïa ka risol bad pynmih kyrteng ïa kiba pass ha ka eksamin Staff Nurse bad ANM, ha kaba la don ka jingpynmih nombor ar sien.
Ki Nongïalam ka JSU bad KSU ha ka Lah Sngi U Blei ryngkat ki nos kiba ïakhun ïa ka eksamin ki la ïakynduh ïa ka Myntri ba khmih ïa ka tnat ka koit ka khiah ka Kong Ampareen Lyng-doh ban ïakren ïa ki jingeh kiba ïadei bad ka jingpynrung kam ïa ki nurse GNM bad ANM. Ha kane ka jingïakynduh la pyntip ruh ïa ki shaphang ka jingdon jong ka ‘Grievances Cell’ kaba ai por 10 sngi ïa ki kyrtong ban ujor bad ban pynpaw ïa ki jingeh. Ki seng ki la dawa ruh ba dei ban pynsangeh noh ïa ka jingpynrung kam bad ban ailad ïa ki kyrtong ban ai jingtip ïa ki jinglap jong ki ha kaba ïadei bad ki rukom leh ïa ki eksamin.
Haba kren sha ki lad pathai khubor hadien ka jingïakynduh ïa ka Myntri, u General Secretary ka JSU u samla Treibor R Suchen u la ong, kam long shuh kaba phylla hapoh ka jylla ban pynlong ïa ki eksam ban thep kam ha ki jaka ba lait jong ka tnat Sorkar.
“Ngi na ka liang ka seng ngi kwah ban ong ba ka Sorkar ka triem palat ban pynlong ïa ki tamasa (concert), hynrei da la poi pat ha ka thep kam thep jam ïa ki khun samla jong ngi, ki ïa kulmar baroh. 6000 ngut baroh ki samla kiba thep kam thep jam hapoh ka kam nos bad ANM, kam dei shuh ka jingleh kamkai, ka la dei ka jingkheiñ sting ïa ki khun samla bad la shu kwah beit ïa ki khun samla ban ïa poi sha ki concert ban ïa biria lang bad kita ki riew paidbah bym don ka lawei,” la ong u samla Treibor.
U la ong, la ïohi ba ka Sorkar kam shimkhia ban pynbeit ïa ki kyndon ki aiñ, ban pynrung ïa kata ka rukom kaba biang ha ka liang ka thung kam thungjam. Wat pynbiria tang da ki concert ne ki rong pyrthei, ka JSU ka ban jur ba ka Sorkar lada kwah ban leh eiei ban leh da kaba bha ban nym klumar ïa ki khun samla.
Katba u Chairman ka KSU Employment Monitoring Cell u samla Reuben Najiar u la ïathuh ba ki don kumba 164 tylli ki kam kiba lait ha ka staff nurse hynrei ka jingkhot jong ki na ka bynta ban ïaleh ïa ka eksam ka la tam palat ïa ka 164. U la ong ba 25 tylli ki kam ki dei na ka bynta ka Open Category, 66 tylli na ka bynta ki Khasi Jaiñtia bad 65 tylli na ka bynta ki Garo.
U la ïathuh ba ka daw kaba ki leh kumne ka dei namar ba ïoh kin don na ki 164 tylli kiba la pass hynrei kim treh ban trei kumta ki hap ban buh da ki ‘waiting list’.
Kumta na ka liang ka seng ka la dawa ba dei ban pynsangeh shwa ïa ka jingpynmih ïa kine ki result namar ka long kaba thurmur bad kumjuh ruh ka la dawa ba dei ban pyllait ïa ki mark jong ki nongïakhun ïa kane ka eksam.
Na ka liang jong ka Meghalaya Medical Service Recruitment Board ruh ka la kular ban sa pyllait ïa ki mark jong ki samla ba ïakhun ïa kane ka eksam ha kine ki khyndiat sngi ban wan.
