Mawkyrwat, Nailur:
Kum ka dak ka jingrakhe ïa ka Swachhata Hi Seva bad ka jingdap 10 snem jong ka Swatch Bharat Mission, ka shlem treikam jong u Executive Engineer PHE Mawkyrwat Division cum Member Secretary District Swatch Bharat Mission ha ka 26 tarik u Nailur 2024 ka la ïoh ban plie paidbah ïa ka Community Sanitary Complex ha ka shnong Nongsynrieh SWKHD kaba la kynthup ïa ka jaka leit paiñkhana paidbah bad ka ïing ban lum ïa ki tiar ki bym pyut.
Ïa kane ka Community Sanitary Complex kaba ka mang tyngka ka la poi kumba T.3 lak ïa kaba la bei pisa da ka Swachh Bharat Mission bad ka Fifteen Finances Commission Fund, la plie paidbah da u ADC jong ka SWKHD u Bah LT Tariang uba long kum u kongsan ha ryngkat ka jingdonlang u Executive Engineer PHE Mawkyrwat Division u Bah K Nongbsaw, Bah DG Nongsiej SDSEO SWKHD kiwei kiwei ki ophisar jong ki tnat sorkar bapher bapher, ki Myntri bad Secretary shnong bad ki paidbah nongshong shnong.
Ha kane ka sngi na ka liang ka shlem treikam u EE PHE Mawkyrwat ka la ïoh ruh ban sam ïa ki ‘work order’ sha 14 ngut ki nongshong shnong jong ka Nongsynrieh kiba dei ki skhim paiñkhana ba la bei pisa da ka Swatch Bharat Mission.
U Bah K Nongbsaw haba ai jingkren ha kane ka jingïalang, u la ïathuh ba ki don haduh 34 tylli ki shnong hapoh jong ka distrik kiba la ïoh jingïarap ban shna ïa kine ki Community Sanitary Complex bad kumba long mynta, 28 tylli la dep ban tei pyndep ïa ki bad kiba sah ki long sa tang hynriew tylli.
U la ïathuh ba na ka liang ka shlem treikam ka la ïoh ban sdang bad rakhe ïa ka Swachhata Hi Seva kaba dei ka prokram jingleh khuid naduh ka 17 tarik u Nailur 2024 bad yn sa ïoh ban pynkut pat ha ka 2 tarik u Risaw 2024 kaba dei ka lyngkhuh sngi kha jong u Mahatma Gandhi.
U la ïathuh ruh ba ha kane ka jingrakhe ïa ka Swachhata Hi Seva, ka shlem treikam ka la ïoh ban pynlong ïa shibun ki prokram bapher bapher kum ka jingleit pynkhuid ïa ki ïew ki hat, ki shlem treikam, ki skul bad ki prokram ai jingpynshai.
Ki kam ba radbah bad ba kham eh ba ka shlem treikam ka la shim ïa ka sien jam ban wanrah ïa ka jingleh khuid ka long ba ki la leit ban pynkhuid ïa ki jakhlia kiba ki nongshong ïew bad ki paidbah ki la lum thup bad bret ïa kine ki jaboh shijaka, kiba sma ïwtung bad isaitmet haduh katta katta ban peit bad na ka liang ka ophis ka la ïoh ban pynkhuid ïa kine jaboh ha ïew Umjaraiñ, ïew Jashiar bad ha ïew Mawkyrwat, stand bus bad pynlong ruh ïa ki prokram ai jingpynshai ban pynsngewthuh ïa ki paidbah halor ka jingkordor jong ka jinglehkhuid.
Shuh shuh u la ïathuh ruh ba na ka liang ka shlem treikam kum shibynta ka jingrakhe ïa ka Swachhata Hi Seva kan sa pynlong ruh ïa ka marathon kaba 15 km ha kaba i Kong Kmoin Wahlang ruh in sa wan ban ïashim bynta bad ka jingïaid rally ki khynnah skul bad kiwei kiwei ki prokram.
