Mawkyrwat, Nailur 30
Ki nongkitam jong ka NPP Primary Unit Photjaud Rangthong ha South West Khasi Hills District ha ka 30 tarik u Nailur 2024, ki la ïoh ban aiti noh ïa ka ïing ba la pynshna thymmai sha ka Kong Syrpailin Thongni bad ki lai ngut ki khun ïa kaba kum ka primary unit ka la ïoh ban pynshna na ka bynta katei ka longïing kaba la mad ïa ki jingeh jingkyrduh ha ka jingim jong ki.
Kum ban shu kdew, ka Kong Syrpailin Thongni kala duh noh ïa la ka ïing ha u snem 2019 shwa ka ban wan ka jingkhang dam (lockdown) hadien ba ka ïing jong ki, ka la shah bam duh noh ha ka ding.
Hadien katei ka jingjia, ka shnong kala ïarap ban pynshna bad tap tin malu mala ïa ka ïing ha kaba ma ka bad ki khun ki la ïoh ban sah haduh mynta hynrei ha ka jinglong kynthei bad jinglong duk long raitoi artad ba ki khun ki dangrit, kam shym la lah ban pynbha ïa ka ïing ha kaba bunsien ha ka por lyuir ki hap ban shong jhieh.
Ka Primary unit Photjaud jong ka NPP hadien ba ki la sakhi ïa kane ka jingshem jingeh jong katei ka longkmie da ka mynsiem ïatip lem bad ka jingïatylli ki la pynshna da ka ïing dewbilat ïa ka Kong Syrpailin.
Ïa katei ka ïing la ïoh ban khap ïa u ribon bad aiti sha ka Kong Syrpailin Thongni da u Bah Mandilos Nongbri, Working President NPP Ranikor Block uba dei ruh u kyrtong ka NPP ha ka MDC elekshon ha ryngkat ka jingdonlang u Rangbah Shnong ki nongkitam ka NPP Photjaud bad ki paidbah nongshong shnong.
U Bah Mandilos Nongbri haba ai jingkren ha katei ka sngi u la ai ka jingïaroh kaba kyrpang ïa ka Photjaud Primary Unit kaba la leh ïa katei ka kam bah ban ïarap ïa katei ka longïing kaba donkam shisha ïa ka jingïarap.
U la pynpaw ruh ka jingsngewkmen ban ïohi ïa ka jingïatylli ki nongkitkam jong ka NPP Photjaud Primary Unit bad bynrap ruh ba katei ka kam ba bha jong ki kan long ka nuksa ba bha ïa kiwei pat.
