Shillong, Nailur 30
Ha ka miet jong ka sngi U Blei, ki pulit ki la ïoh ban kurup noh ïa ki tiar kiba la shah tuh ha kaba ïadei bad ka case kaba la rejistar hapoh ka thanad Rynjah.
Ïa kitei ki tiar tuh la lap na ka thaiñ Saw Furlong bad na ka liang jong ki pulit ka Nongmensong Outpost kila leit mardor sha katei ka jaka ba don kitei ki tiar tuh.
Ha ka kyrwoh khubor, u Superintendent of Police (SP) ka East Khasi Hills u Bah Sylvester Nongtnger u la pyntip ba ha ka jingtohkit, ki pulit kila lap ïa kawei ka trok 6 shaka kaba don ïa u registration number AS01-CC-3985 ha kaba la thep lang ïa kitei ki tiar tuh bad ki mar jot mar pei kiba dei hi ki tiar tuh.
Ki tiar tuh kiba la ïoh ban kurup na kane ka trok ki kynthup haduh 10 unit ki Beam Web Assembly, 32 Unit ki Shuttering Jack, kawei ka mobile phone bad ka sim card. Nalor kane, la kurup noh ruh ïa kawei ka taksi kamai kaba don ïa u registration number ML05-K-7554 kaba don jingïadei bad katei ka jingjia.
Ha kawei pat ka khubor, u SP u la pyntip ba ki pulit ki la lap ksai ha kaba ïadei bad kawei pat ka case jong ka thanad Sadar, lyngba ka jingïoh kurup ïa ka kali na Imphal, Manipur.
Katei ka jingjia kala mih lyngba ka jingujor ejahar pyrshah ïa u Mohammad Fareed, uba shong ba sah ha Barapathar Mawbah, Shillong ha kaba u nongujor u la kynnoh ba u Fareed u la pynbor ïa u ban long u ‘Guarantor’ ne u nongbahkhlieh ha ka jingthied ïa kawei ka kali Maruti Suzuki Eeco (5 Seater), khlem da pynpaw ba ïa katei ka kali yn thied bad register ha ka kyrteng jong utei u nongujor kaba la pynlong ïa u ban hap ban siew ïa ka ram ne ka EMI.
Lyngba ka jingtohkit kaba khlem shongthait, la lap ksai ïa katei ka kali bad la wanrah noh biang ïa ka sha nongbah Shillong.
Ka jingtohkit halor kitei ki ar tylli ki jingjia ka dang ïaid shakhmat ban khmih bniah ïa ki jingshisha bad ïa ka jinglong jingman baroh, la ong u SP.
