Shillong, Nailur 30
Uwei u nongshong shnong ka nongbah Shillong u la shah thok pisa haduh 3 lak tyngka ha uwei u briew uba la leh mynleh kum u trai jong kawei ka kompeni. ka khubor kaba la ïoh na ki pulit la ong ba une u briew u la ujor ba ha ka 10 tarik mynta u bnai, u la ïoh pdiang ka ‘phone call’ na u number bad u briew bym ithuh, ha kaba u nongphone u la leh mynleh ïa lade kum u trai jong ka JC Construction Company ha kaba u la pyntip sha u, ba u paralok jong u, u don hapdeng ka jingshitom ha kawei na ki jaka ai jingsumar bad ha kajuh ka por u la ïoh ban thok pisa ruh haduh T.3 lak.
Ha kaba ïadei bad kane, ki pulit ki dang pynlong ka jingwad bniah halor kane ban lap ïa ki jingshisha.
Ha kawei pat ka khubor na ki pulit la ong ba u Wankit Kupar Shylla u la ujor sha ki pulit ba ha ka 24 tarik mynta u bnai ha ka por kumba 5.30 janmiet, ki runar bym lah ban ithuh ki la ïoh ban tuh ïa uwei u Remote Radio Unit (RRU) uba shongdor kumba T.2 lak na kawei ka jaka ba don u tower ha ka thaiñ Mawblei, Shillong.
