Shillong, Nailur 30
Ka North Eastern Hill University (NEHU) ka la pdiang sngewbha ïa ka kynhun na ka tnad kam bar-ri ka Thailand, hapoh ka jingïalam ka Sasirit Tangulrat kaba dei ka Director-General ka tnad South Asian, Middle Eastern, bad African Affairs.
Kane ka jingwan jngoh ka long ka sienjam kaba kongsan ban pynkhlaiñ ïa ka jingïadei hapdeng ki shlem jingpule ka India bad Thailand ha ryngkat ka jingpynleit jingmut halor ki prokram ïakylliang, ka jingïatreilang ha ka jingwad bniah, bad ka roi ka par.
Ïa kane ka kynhun, kaba kynthup ïa ki Professor bad ki ‘riewshemphang na ki skulbah bad ki jaka pule ba pawnam ka Thailand, la pdiang sngewbha da u Prof. Prabha Shankar Shukla, Vice-Chancellor ka NEHU.
Ka jingïalang ka la pynbiang ïa ka rynsan kaba paka ïa baroh arliang mamla ban ïakren ïa ki bynta kiba lah ban ïatreilang ha ka liang ka pule-puthi bad ka jingwad bniah.
Ha ka jingkren jong u, u Prof. Shukla u la ban jur halor ka jingdonkam jong ka jingïatreilang ha ka liang ka pule-puthi ha ka pyrthei kumjuh ban kyntiew ïa ki buit thymmai bad ka jingïasngewthuh-jingmut hapdeng ki lariti bapher-bapher.
U la kdew, “Ka jingïakren mynta ka sngi ka long ka jingpynshisha ïa ka jingkular jong ngi ban kyntiew ïa ki jingïatreilang hapdeng ki ri kiba pynriewspah ïa baroh ar ki jingïakynduh – ha ka pule-puthi bad ki jingmih na ka jingwad bniah. Ngi khmih lynti ban ïatreilang bad ki paralok jong ngi na Thailand ban thaw ïa ki jingïadei kiba neh ha ka liang ka pule-puthi ka ban ai jingmyntoi ïa baroh ar tylli ki ri.”
Ha kane ka jingïalang, u Prof. S.R. Joshi, Director ka R&D Cell, u la ai ka jingbatai bniah halor ki jingkhlaiñ ka pule-puthi bad ka jingwad bniah jong ka NEHU, da kaba kdew ïa ki jingthmu ba kongsan jong ka skulbah ha ki bynta kum ka ‘Life Sciences’, ‘Social Sciences’, ‘Humanities’, ‘Management’, ‘Engineering’, bad ‘Technology’.
Hadien kane, la bud sa ka jingpynithuh ïa ka kynhun na Thailand da ka Sasirit Tangulrat, kaba la batai bniah ïa ki bynta ba kongsan jong ki, khamtam ka jingïatreilang ha ka pule-puthi, ka jingïakylliang ïa ki samla pule bad ki nonghikai, bad ka jinglah ban wanrah ïa ka jingpule Thai ha NEHU.
Ka jingïakren kaba bud ka long halor ka jingïakylliang ïa ki buit treikam, ha kaba baroh arliang ki la wad ki lad ki lynti ban ïatreilang ha ki projek wad bniah, ka jingïakylliang nonghikai, bad ki sienjam ban kyntiew ïa ka jingroi ha ka jingpule markylliang. Baroh arliang mamla ki la mynjur ban thaw ïa ka rukom treikam na ka bynta ka jingïatreilang, ha kaba ki jingïakren sdang ki long halor ka jingseng ïa ki prokram ïakylliang bad ka jingïatreilang ha ki projek wad bniah. Ha ka jingkren pynkut, u Prof. Timir Tripathi, dkhot ka R&D Cell, u la pynpaw ïa ka jingkyrmen skhem halor ka lawei jong ka jingïasnohkti lang bad ong ba ka NEHU ka sngewkmen ïa ki lad ki lynti kiba don hakhmat bad ngeit skhem ba kane ka jingïatreilang kan kyntiew shi kat dei ïa ki kam wad bniah bad pule-puthi.
Shuh shuh kane ka jingwan jngoh ka la kut da ka jingpynthymmai ïa ka jingkular na baroh arliang – NEHU bad ka kynhun na Thailand ban trei na bynta ban pynkhlaiñ ïa ki jingïadei lyngba ki sienjam ïatreilang ha ka pule-puthi, ka jingwad bniah, bad ka jingïakylliang ha ka liang ka lariti.
