Shillong, Risaw:
U Myntri Rangbah ka Jylla, u Conrad K Sangma ha ka Sngi Balang ka taïew u la ban jur halor ka jingdonkam ban tih ïa ki marpoh khyndew katkum ka juk stad saïan.
U Sangma u la ong ïa kane haba plie ïa ka ‘workshop’ halor ka phang, “Enhancing Mineral Exploration through NMET” kaba la pynlong da ka Directorate of Mineral Resources, ka Sorkar Jylla ha State Convention Centre.
Haba ai jingkren, u Myntri Rangbah u la ong ba ïa kane ka ‘workshop’ la pynlong ha ryngkat ka jingthmu ban noh synñiang sha ka thong jong ka ri ban pynlong ïa ka India ka ‘Viksit Bharat’.
U la ong ruh ba ha ryngkat bad ka jingkiew jong ka teknoloji ha kine ki por mynta, ka jingwad ïa ki marpoh khyndew ka la kham long kaba tikna, kaba suk bad katkum ka juk stad saïan.
“Ki paralok ha ka liang ka teknoloji kum ka NESAC ki la don ka bynta kaba kongsan ym tang ha ki kam tih marpoh khyndew hynrei ha kiwei pat ki tnad treikam kum ka ‘Water Resource’ bad ‘Forest Resource Mapping’,” u la ong.
U Sangma u la ong ruh ba katba dang wad bad tih ïa ki marpoh khyndew na bynta ka roi ka par ha baroh ki liang jong ka Jylla bad ka ri, ka long ruh kaba donkam ban pyntikna ban pynduna ïa ka jingktah ïa ka mariang bad ban buh dak ha kano-kano ka bynta.
“Ngi kum kiba ïashim bynta ngim lah ban kyntait ïa kine ki jingshisha bad kaba kongsan ban pyntikna ïa ka jingpynneh-pynsah bad ka jingïa biang tara,” u la ban jur.
U Myntri Rangbah u la bynrap ba ka rukom bat khyndew jong ka Jylla ka long kaba kyrpang bad kaba la suh thied ha ka lariti bad ka riti dustur.
“Kine ki bynta ruh ki dei kiei-kiei kiba ngim kwah ban kyntait bad ka long ruh kaba kongsan ban burom ïa kine ki lariti, ki riti-dustur bad ki briew kumjuh ban ïatreilang bad ki ban tei ïa ka jingïasngewthuh jingmut bad ka jinglong-jingman ka ban pyntikna ba baroh ki don ha kajuh ka rynsan,” u la pynpaw.
Haba pynkut ïa ka jingkren, u Myntri Rangbah u la ong ba ka jingkylla jong ka rukom tih marpoh khyndew na ka rukom tih tynrai kaba ki nongtih jong ka Jylla ki la ïadon bynta da ki spah snem sha ka rukom tih katkum juk stad saïan – hap ban don ka nongrim kaba biang.
“Ka jingkhang ïa ka rukom tih marpoh khyndew ka bym dei katkum ka juk stad saïan ka ktah jur ïa ka ïoh ka kot jong ki longïing kiba shaniah ha ka jingtih marpoh khyndew bad halor ka ïoh ka kot jong ka Jylla, kumta ka jingkylla ka hap ban long kaba beit na bynta baroh ha kaba ka jingkylla ka jia hapoh ka por ba la buh,” u la bynrap.
Shuh shuh u Myntri Rangbah ha kane ka sngi u la pyllait ruh ïa ka ‘State Geological and Mineral Map of Meghalaya’ ha ka jingheh kaba 1:1 ‘Million Scale’ bad pyllait paidbah ruh ïa ka ‘Meghalaya Minerals Database’.
