Shillong, Risaw 01
Ka Hynñiewtrep Youths’ Council (HYC) ka la dawa na ka Sorkar Jylla ba kan thung da ka ‘Judicial Inquiry’ ne ka kynhun ban tohkit halor ka jingmih na ka kynrum-kynram ha ka rukom pynbna ïa ka risol thung kam jong ki Staff Nurse bad ANM.
Haba kren sha ki lad pathai khubor ha ka Sngi Ba-ar u President ka HYC Sengkmie Bah Roykupar Synrem u la ong, “Ngi dawa ïa ka Sorkar ba kan thung noh mardor ïa ka kynhun tohkit ka ban khlieh da u Session District Judge ne ki Judge ba la shongthait halor kane ka kam.”
Une u nongïalam ka HYC u la ban jur ruh ba donkam ban pynshitom ïa kiba donkti pynbna ïa ka risol bad ong ba ka long kaei-kaei kaba sngewthamula ban ïohi ba dang don ka jingbakla ha ka thup risol wat hadien ba la pynmih ïa ka thup haduh lai sien. Kumta ka long kaba donkam ban thung da ka jingtohkit bad ym dei ban tohkit da ka tnat ka koit ka khiah, u la ong.
U Bah Roykupar u la kynthoh ba kane ka jingbakla ka la pynduh mynsiem ïa ki samla kiba wad kam namar wat da kaba pyndonkam da ki OMR Sheets ruh ka dang bun ka jingbakla. U la kynnoh bad buh jingkylli ruh ba katkum ka jingtip ba la ïoh da ka seng, kumno ka lah ban long ba wat kito kiba khlem leit thoh ïa ka eksamin ki paw kyrteng ha ka thup, ha ryngkat u Roll Number bad ka Marks ba ïoh.
Nalor kane u President ka HYC u la ong ba ka tnat ka koit ka khiah ka dei ban pynsangeh shwa ïa kane ka jingthungkam Staff Nurse bad ANM kat bym pat pynbeit ïa ki jingbakla.
