Shillong, Risaw 01
Ki nonghikai skul SSA kiba don hapoh ka shatri jong ka All Meghalaya SSA School Teachers’ Association (AMSSASTA) ha ka 1 tarik u Risaw 2024 ki la pynlong da ka jingïakhih shong kyllaiñ mungor kaba khlem buh por ha madan Malki halor ka jingdawa na ka Sorkar Jylla ba ka dei ban kyntiew noh ïa ka tulop jong ki da 100%.
Kum ban shu kdew hangne, ka jingdawa jong ki nonghikai skul SSA kiba don hapoh ka shatri jong ka AMSSASTA ka la ïaid mynta da ki snem. Kane ka jingshim rai jong ki nongïalam ka AMSSASTA ka dei hadien ka jingkut noh ka jingaipor jong ka synjuk ïa ka Sorkar Jylla kata naduh u snem 2019 kaba dei hadien ka jingdep ban ai ïa ka jingtyrwa halor kane ka bynta hynrei na ka liang ka Sorkar ka khlem pat shym leh eiei satia halor ka jingdawa ka kynhun.
Haba kren sha ki lad pathai khubor, u President ka kynhun, u Bah Peter Thyrniang u la ong ba na ka liang ka kynhun, naduh u snem 2019 ka la pyrshang ban ïakynduh bad ki bor jong ka Sorkar ba kan shimkhia ne leh eiei halor kane ka jingdawa ki nonghikai hynrei haduh mynta wat la ki lah ïaid bun tylli ki snem hynrei ym shym la ïohi ba kan don kano-kano ka jingseisoh ruh.
“Na ki 4 snem kiba mynshwa, ngi sngewdei hok ba ngin shah pynkyntiew biang 100% lada ngi ïanujor bad ka rukom long-rukom man ha kane ka juk kaba mynta ha kaba ïadei bad ka jingkiewdor ki mar-ki mata kaba la wanrah ka jingeh ïa ngi ki nonghikai ba ngin pynbit-pynbiang ïa ki khun-ki kti jong ngi bad ïa ka longïing-longsem jong ngi”, ong u Bah Thyrniang.
U Bah Thyrniang u la ong ba kum ka kynhun kan ïeng skhem beit halor ka jingdawa ban kyntiew ïa ka tulop jong ki da 100% bad kum ka kynhun kan shim beit kumba la ju leh da ki Sorkar barim kiba ju pynkiew ïa ka tulop ki nonghikai SSA da 100%.
Na ka liang kiwei pat ki nonghikai SSA ki la ïathuh ba ha ka jingsynshar jong kiwei pat ki Sorkar ha ki snem kiba lah dep, ka jingkyntiew ïa ka tulop jong ki nonghikai la leh man la ka 3 snem ne 4 snem hynrei naduh ba la synshar ka Sorkar kaba mynta pat, kam pat shym la don kano-kano ka jingkyntiew ïa ka tulop jong ki nonghikai SSA.
Shuh shuh ki la ïathuh ruh ba ka sien kaba khadduh ba la pynkiew tulop jong ki nonghikai SSA ka dei ha u snem 2016. Kumta na ka liang jong ki nonghikai ki la pynpaw ba kin pynlong ïa kane ka jingïakhih kaba khlem buh por tad haduh ba ka Sorkar kan khot ïakren ïa ki nonghikai SSA.
Kitei ki nonghikai ki la ong ruh ba kin ym pynsangeh satia ïa ka jingïakhih jong ki lada kim pat ïoh ban kheit ïa u soh jong ka jingjop bad ong ba na ka liang ka Sorkar ka dei ban ai da ka jingthoh ban pyntip ba ka la leh eiei na ka bynta ki nonghikai skul SSA.
“Lada ka Sorkar ka shu ïakren bad ngi khlem ka jingthoh, ngin ym pdiang ïa kata ruh”, la bynrap kitei ki nonghikai.
