Shillong, Risaw 01
Ka jingshah prong jong ki ïing ki sem bad ka jingshah tuh jong ki ar shaka ka la nangjur na kawei ka sngi sha kawei pat. Dang ha kine khyndiat sngi la bun ki ïing kiba la shah prong tuh bad ki ar shaka kiba la shah tuh haduh ba ka la pynshong syier ïa ki nongshong shnong.
Katkum ka khubor kaba la ïoh na ki pulit la ong ba ka Kong NW Marbañiang ka la ujor sha ki pulit ba ha ka 29 tarik mynshem bnai, uwei u briew bym lah ban ithuh durkhmat, u la prong jubor hapoh ka ïing sah jong ka, kaba don ha Lachumiere, Shillong bad ban tuh ïa ki waiar kiba shongdor haduh kumba T.40 hajar.
Kane ka jinglap bad tip halor kane ka jingjia, ka dei lyngba ka jingïoh ring jong ka kor CCTV kaba la pyndait ha kane ka ïing.
Kumjuh ruh u Jonny Gogoi u la ujor sha ki pulit ba ha ka 26 tarik mynshem bnai, ki runar bym lah ban ithuh ki la prong jubor sha ka ïing sah ka jong u kaba don ha Nongrimbah, Block-IV, Shillong bad ban rah tuh ïa uwei u tyndong lyer shet jingshet (LPG cylinder).
Ha kawei pat ka khubor, u Post Commander jong ka Lyngkhat BOP, BSF ha East Khasi Hills u la ujor ba ha ka 29 tarik mynshem bnai ha ka por kumba 7 baje janmiet, ka arshaka jong ka ophis kaba don ïa u registration number AS01-BS-1616 la lap ba ka la jah na ka jaka ba pynïeng ha MT Branch jong ka Lyngkhat BOP, BSF. La suba jur ba kane ka arshaka ka la shah tuh ha ki briew ki bym lah ban ithuh.
Kawei ka longkmie ka la ujor ba ha ka step jong ka 29 tarik mynshem bnai, kata ha ka por kumba 11.30 eiei, ki runar bym lah ban ithuh ki la tuh ïa ka arshaka jong ka, kaba don ïa u registration number ML05-AC-3112 najan jong ka Garo Baptist Church ha nongbah Shillong.
U Rajanjit Singh ruh u la ujor ba ha ka miet jong ka 26 tarik mynshem bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS01-FU-2500 na Upper Nongrim Hills, Laitumkhrah, Shillong.
U Chira Walsrang K Marak ruh u la ujor sha ki pulit ba ha ka miet jong ka 26 tarik mynshem bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML13-6740 na Tura ha West Garo Hills.
U Pitting A Sangma uba na ka shnong Sildubi ha North Garo Hills u la ujor sha ki pulit ba ha ka step jong ka 25 tarik mynshem bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS18-K-0127.
Ha kawei pat ka khubor, ki pulit ha ka janmiet jong ka 27 tarik mynshem bnai, ki la lap ïa kawei ka ar shaka kaba don ïa u registration number ML08-D-0832 ba la shu ieh kumto na ïew Deku ha South Garo Hills bad kumta ïa kane ka arshaka la rah noh sha thanad Chokpot na ka bynta ban lait na ka jingshah tuh.
