Shillong, Risaw 01
Ka Hynñiewtrep Youths’ Council (HYC) ha ka Sngi Ba-ar ka la kynnoh ba ka Notice Inviting Quotation (NIQ) ba la pynmih da ka Directorate of Housing ha ka 10 tarik Nailur, 2024 ka pyni ïa ka jingleh bym hok bad jingpyrshang ban ai jingmyntoi tang ïa ki katto-katne ki kompani ne nongshna tin ha Meghalaya.
Katkum ka NIQ la ong ba kiba ïoh ïa ka kontrak kin pynpoi ïa ki Aluminium Roofing Sheet sha ka tnat kaba shong dor haduh T.69,65,00,000.
Haba kren sha ki lad pathai khubor, u President ka HYC Roykupar Synrem u la ong ba ki kyndon ba la buh da ka NIQ ki dei kiba la shna ha kata ka rukom kaba pynsngew ba ka tnat ka la dep ban pynbeit lypa ïa ki briew kiba don jingïadei ba ïajan bad kiba bat ïa u lakam ka synshar-khadar ba kin ïoh ïa ka kontrak.
Ki kyndon kyllum ha ka NIQ ka ong ba tang ki nongseng kam (Entrepreneur) kiba mihkhmat ïa ki karkhana kiba don ïa ki unit ba pynmih ïa ka mar ha ka Jylla kiba lah ban ïashimbynta ha ka jingthep tender, kampher la kine ki nongseng kam ki don ne em ïa ka jingtbit ha ka jingpynmih ïa ka mar ne kam shalan, ka dei ka bym donkam satia, u la ong.
Shuh shuh u Bah Roykupar u la ong ba ha ka technical bid ruh, ki kyndon ïa ka jingdon pisa jong ki nongthep tender, la pynwan ha kata ka rukom ka ban ai jingmyntoi lane noh shiliang sha u ne ka briew da kaba buh ïa ka kyndon ba ka jingïoh kamai ba shisnem la buh ba kan long tang T.1 klur katba ha ka NIQ jong ka 11 tarik Rymphang 2022 na ka bynta ka kontrak kaba shongdor T.20 klur tyngka, ka jingdonkam jong ka jingïoh kamai ba shisnem kam dei ban duna ïa ka T.10 klur ban ïoh ïashimbynta ha ka jingthep tender.
Une u Nongïalam ka HYC u la ong, “Kine ki kyndon ha ka NIQ ki la pynsngew artatien halor ka jinglong shai ka rukom pynïaid ïa ka jingthied ïa kine ki tin sop ïing bad lehse ka lah ban don ka jingpyrshang na ki bor khmih ban rieh ha lyndet kine ki kyndon tang ban ai jingmyntoi ïa ki kompani ne nongseng kam ba don jingïadei ba kin ïoh ïa ka kontrak.”
