Nongpoh Risaw:
Ka ophis jong ka District Programme Officer, ICDS ka East Khasi Hills bad Ri Bhoi District ha ka sngi Nyngkong ka la ïoh ban pynkut noh ïa ka Rashtriya Poshan Maah Programme ïa kaba la pynlong ha Lawbyrwa Aganwadi Centre, Ri Bhoi District.
Ha kane ka sngi la ïoh ruh ban plie paidbah ïa ka Saksham Aganwadi Centre ha kaba la wan ban plie paidbah da u Bah AL Myrthong, BDO jong ka Umsning C&RD Block ha ka jingdon ryngkat ki ophisar bad nongtrei na ki tnat bapher bapher jong ka sorkar ba kynthup ïa ka tnat ka Koit ka Khiah, Horticulture, MSRLS bad kiwei kiwei.
Haba ai jingkren ha kane ka sngi, na ka liang u Bah AL Myrthong u la ai ka jingkhublei ïa ka tnat ICDS kaba la lah ban pynïoh ïa katei ka Aganwadi Centre kaba donkam eh na ka bynta ki nongshong shnong na ka bynta ka jingroi ka par bad ka bha ka miat jong ka shnong khamtam eh ïa ki khynnah rit bad kumjuh ruh ïa ki longkmie kiba la ïoh ïa ki jingbam tei met lyngba katei ka Centre.
Ha kane ka sngi la ïoh ruh ban pynkup burom ïa ki nongïalehkai kiba la wanrah nam bad burom ïa ka District bad kumjuh ruh ïa ki nongtrei jong ka Anganwadi.
