Shillong, Risaw 01
Ka komiti ki ‘riewshemphang halor ka bhah thung kam ne ka ‘Expert Committee on the State Reservation Policy’, kan pynlong ïa ka jingpynsngew paidbah ha Shillong, Tura bad Williamnagar naduh ka 3 tarik mynta u bnai.
Kane ka long katkum ka jingpyntip lyngba ka jingpynbna ba la pynmih da u Shongknor ka komiti, u Justice M. C. Garg (Retd) kaba la phah sha ki kynhun bapher-bapher ha u bnai ba la dep.
Ka komiti kan pynlong ïa kine ki jingpynsngew paidbah kum ka jingbuddien ïa baroh ki jingthoh/jingïakren/jingai jingmut/jingkynthoh ba la phah sha ka komiti.
Haba phai sha Shillong, ka komiti kan pynlong ïa ka jingpynsngew paidbah ha ka 3, 4 bad 5 tarik Risaw katba ha Tura bad Williamnagar, yn pynlong naduh ka 21 tarik haduh ka 25 tarik Risaw.
Ka jingpynbna ka ong ruh ba ka jingpynsngew paidbah ha Shillong kan long ha State Convention Centre naduh ka por 9 baje mynstep haduh 1 baje mynsngi bad naduh 2 baje nohphai sngi haduh 6 baje janmiet.
Ha kawei ka liang, ïa ki jingtip ba bniah halor ka jingpynsngew paidbah ha Tura bad Williamnagar yn sa pyntip hadien.
Shuh shuh ka komiti ka la kyntu ïa baroh ki kynhun kiba wan sha ka jingpynsngew paidbah ha ka 3 tarik Risaw ban wanrah lang ïa ki kot ki sla ban kyrshan ïa la ki jong ki jingthoh kiba ki la aiti.
