
Nongstoiñ, Risaw:
Ka Hynñiewtrep Youths’ Council (HYC) West Khasi Hills District ha ka Sngi Palei ka la ïoh ban rakhe kynmaw burom ïa ka lyngkhuh sngi ïap kaba khyndai jong u Maieid Hopingstone Lyngdoh da kaba leit buh syntiew bad pynlong jingïalang kynmaw burom ha u mot sah kynmaw ba la tei da ka Kur Lyngdoh Nonglait ha Mawkyllei.
Ha katei ka jingïalang la donlang ki bahaïing bahasem u Bah Hoping, na ka Kur Lyngdoh Nonglait, ka shnong bad ki Nongïalam ka HSPDP.
U Samla Lumlang Kharsyiemlieh, President ka HYC West Khasi Hills District u la ong, “Ngim lah ban bud ïa ki nuksa jong phi hynrei ngin ïai pyrshang ban bud ïa ki nuksa ba phi ïalam”.
Kawei ka nuksa ba bha u Maieid Hoping u ai ka long ban shakri ym tang ïa ka jaidbynriew hynrei ïa ka Kur, ïa ka Balang, ïa ka Shnong bad leh kumba u ong ha ka Motto jong u Maieid “Iaineh bad Lehhok,” ong u samla Lumlang.
U samla Lumlang u la ong ruh, Maieid kumba phi la hikai ïa u Kohtriang hikai ruh ïa ngi ban shakri hok ïa ka jaidbynriew.
Shuh shuh u la ong ruh ba ha ka 16.7.2015 ha ka por ka HYC ka leh burom ïa u Maieid ha ïing jong u ha Laban, ha kaba u la ong ynda la khlaiñ un ïalam ïa phi ki samla ban tip ïa ki pud Khasi ha Langpih bad kiwei. Kumta ka seng ka kular rangbah ban bud nuksa ban ym ailad da lei-lei ïa ka Sorkar Assam ban knieh ïa ki jaka Khasi ha Langpih Area bad u la pynpaw ruh da kaba ong, “Lada ngi duh ïa ki jaka jong ki paradoh parasnam ha thaiñ Langpih ngi kloi ban ai wat ïa ka snam”.