Shillong, Risaw 01
Uwei u briew ïa uba la kynnoh ba u la donkti ban tuh ïa ki jhur na kawei ka kper kaba don ha Lad Nongkrem, u la shah bat noh ha ki samla ryngkat ka shah bom shah tied.
Katkum ka khubor kaba la ïoh na ki pulit la ong ba ha ka 29 tarik mynshem bnai ha ka por kumba 10 baje mynmiet, ki nongshong shnong ka Lad Nongkrem, Shillong ki la ïoh bat ïa uwei u briew ba kyrteng u Welcomestar Nongrum (20 snem), halor ka jingsuba ba u la donkti ban tuh.
La ong ba ha ka por ba ki la pynlong ka jingtohkit, la lap ba une u briew ba la shah kynnoh tuh, u dei uba la donkti ban tuh ïa ki jhur na kawei ka kper kaba don ha Lad Nongkrem, bad kham hadien u la shah bat ha ki samla kiba la shoh bad tied ïa u. Ïa une u briew la pynkit noh sha Civil Hospital Shillong na ka bynta ban leh ïa ka medical.
