Shillong, Risaw 01
Uwei u briew uba la kam ïa lade ba u dei u heh jong ka RBI u la ïoh ban thok bad shukor pisa na kiba bun ki briew da kaba pyndonkam da ka bank account, ka ATM bad SIM card jong kawei ka briew kaba na ka shnong kaba hap ha Eastern West Khasi Hills.
Katkum ka khubor kaba la ïoh na ki pulit la ong ba kawei ka kynthei kaba dei ka nongshong shnong na kawei ka shnong ha Eastern West Khasi Hills ka la ujor ba ha ka 24 tarik u bnai Nailar, 2024, ka la ïoh ïa ka phone call kaba la wan lyngba ka WhatsApp kaba khlem pynpaw kyrteng, ha kaba u nong ‘phone’ uba kam ba u dei u heh ka RBI u la bthah ïa ka ban plie ïa kawei ka Bank Account bad ka ATM card bad ruh ban leh SIM card ba thymmai.
La ong ruh ba une u briew u la bthah ruh ïa ka kynthei ba kan phah pat ïa kine sha ka skul MR Delight Public School, DK Mohan Garden School bad ha kaba u la kular ruh ban sa phah pisa ha katei ka Bank Account ba thymmai ba la kdew haneng.
La ong ba ha kaba ïadei bad kane, katei ka kynthei ka la kohnguh kaba la leh ha ka 6 tarik Nailur, 2024) hynrei la pyntip ba ha ka 25 tarik Nailur, 2024, ki heh jong ka HDFC Bank na Mairang ki la pyntip sha ka, ba ki la don ki riew sniew kiba ym lah ban tip ki la leh thok bad thok ïa kiwei da kaba pyndonkam ïa ka Bank Account, ka ATM Card bad ka SIM Card jong ka.
Ha kaba ïadei bad kane ka jingujor, na ka liang jong ki pulit mynta ki dang pynlong ïa ka jingtohkit ban lap ïa ki jingshisha baroh.
Ha kawei pat ka khubor na ki pulit la ong ba kawei ka nongshong shnong na ka thaiñ Upper Shillong ka la ujor ba ha ka 27 tarik mynshem bnai, ka la don ka jingshah sei pisa khlem ka jingtip jong ka kaba la kot haduh T.7 lak na ka UBI account jong ka.
