Shillong, Risaw:
Ki paidbah kiba ju kyrshan ïa ki phlim Khasi ki la ïoh ban wan ai jingkyrshan ïa ka phlim ‘Skap’ kaba la sdang pyni ha ka 27 tarik Nailur 2024 ha Bijou Cinema Shillong.
Ïa kane ka phlim la pyni saw sien ha ka shisngi, kita ha ka por 11:30 mynstep, 2baje nohphai sngi, 5 baje janmiet bad 7 baje mynmiet.
Ki paidbah kiba wan peit ïa kane ka phlim kim lah set ban rkhie namar ka dei ka phlim biria kaba u briew na nongkyndong u itynnad ïa kawei ka samla kynthei kaba na Shillong.
Haba ïakren bad ki paidbah kiba wan peit ïa kane ka phlim ki la ai jingïaroh ïa u Bah Jimmy Wann bad Sunday Salahe kiba tbit palat ban ak haduh ba kin da rkhie ha Bijou Cinema.
Haba ïakren bad ka Regina Lamo, ka la pynpaw ka jingsngewkmen ba ki paidbah ki la wan ai jingkyrshan ïa ka phlim kaba la ak ba la pyni mynta ha Bijou Cinema.
Ka la ïathuh ba ka la sdang ban rung sha ka kam ak phlim naduh u 2013 haduh mynta 2024. Ki por ki ïaid namar don ki por ka ïoh bynta kum ka puron don ki por ba ak kum ka kmie hangne ka la ïapher bha ïalade na kawei ka phlim sha kawei pat.
Ka la pynpaw ka jingsngewkmen naduh ba ka rung ha ka kam ak phlim ki briew ki la ithuh haba ka leit sharum-shaneng ne wat shaduh social media.
