Shillong, Risaw 02
Ka National Institute of Technology (NIT) Meghalaya kum kawei na ki shlem pule kaba trei kum ka Regional Coordinating Institute (RCI) hapoh ka jylla Meghalaya ka la ïashim bynta hapoh ka prokram Unnat Bharat Abhiyan (UBA) kaba dei ka prokram ba pawnam jong ka tnat pule puthi, ka Ministry of Education (MoE), ka Sorkar Pdeng, ka la pdiang ïa ki phra tylli ki shnong, kiba kynthup ïa ka Umkhaba, Kutmadan, Mawsmai, Saitsophen bad Kalatek kiba hap hapoh ka East Khasi Hills District, ban pynshong nongrim na ka jingïohi jngai jong ka jingkylla ha ki rukom pynroi nongkyndong da kaba bsut ïa ka jingnang jingstad bad buh ha ka kyrdan ba kham shapoh ban pynriewspah ïa ka jingim jong ki nongshong shnong, ban kyntiew ïa ka rep ka riang bad ban thaw ïa ki kor ki bor kiba lah ban pynneh pynsah ïa ka mei-mariang.
Ka UBA Cell, NIT Meghalaya ka la ïoh ïa ka jingïarap na ka M/s Shree Gautam Construction Co. Ltd. Guwahati hapoh ka RITES Ltd., lyngba ka skhim CSR, ban pynïoh ïa ka lieng enjin na ka bynta ki trai shnong Kalatek khnang ba kin lah ban pyndonkam ïa ka ha ka ban ïaid lyngba ka wah kum shi bynta ha ka kit-ka bah bad ka rah-ka rong jong ki man ka por.
“Ha ka sngi rakhe ïa ka Gandhi Jayanti kata ha ka 2 tarik u Lber, ngi la aiti ïa ka lieng enjin sha ki nongmihkhmat jong ka shnong Kalatek, Shella Bholaganj Block, East Khasi Hills District”, ong ka UBA Cell, NIT Meghalaya.
Ha kane ka sngi la pynkup burom da u Professor Pinakeswar Mahanta uba dei u Director ka NIT Meghalaya, Dr. Bhaskarjyoti Chakravarty, Registrar, NIT Meghalaya bad u Biswajit Goswami, Jt.GM, RITES Ltd.
Ha katei ka sngi la wan ïashimbynta ruh ki nongwan badonburom kiba kynthup ïa ka Miss Saloni Verma, SDO (Civil) bad Secretary Maharaj, Swami Anuragananda Ji, RK Mission Sohra.
