Shillong, Risaw 02
U MLA ka North Shillong Konstitwensi, Bah Adelbert Nongrum u la ong ba ka thong bad ka jingangnud jong u ka long ban weng noh shisyndon ïa ka jingdheng kali kaba ki briew ki ïakynduh jingeh khamtam ha ka por ba ki khynnah ki long skul bad kolej. Kane ka la ktah shikatdei eh wat haduh ba ka la pynlong ïa ki Dorbar Shnong ba kin hap ban thung da ki briew ban ïarap pynïaid ïa ki kali tang ban lait na ka jingsahkut bad dheng kali.
Haba kren sha ki lad pathai khubor ha ka 2 tarik u Risaw 2024, u Bah Adelbert u la pyntip ba ha kaba ïadei bad kane, u la khot ban pynlong da ka jingïakren ban ïaphylliew jingmut ha ka ban ïathir-ïatai halor kane ka phang ïa kaba la wan ban ïashimbynta da ki nongsynshar shnong jong ka lympung ki hynriew tylli ki shnong kiba kynthup ïa ka Dorbar Shnong Wahthapbru, Mission Compound, Mawkhar, Umsohsun, Wahingdoh, Riatsamthiah lem bad ka Dorbar Shnong jong ka Jaïaw Pyllun kaba la pynlong ha ka ïingdorbar jong Dorbar Shnong, Jaïaw Pdeng ha ryngkat ki pulit pynïaid kali jong ka thanat Lumdiengjri bad ki nongïalam jong ka kynhun ki nongñiah taksi kamai.
U Bah Adelbert u la pyntip ruh ba ha kane ka prokram ïathir ïatai, u la pynsngew halor ki jingduna bad jingbakla kiba donkam ban pynbeit bad ka jingkhmih lynti ban pynmih ïa ki surok kiba long kum ki By-Lane ne Sub-Lane kam dei ka kam kaba lah ban long khamtam lada dei ki surok kiba don hapoh ki shnong ki thaw.
U Bah Adelbert u la kyntu ruh ïa ki paidbah kiba shong kali ba kin ïatreilang bad kiba nongñiah kali da kaba tip haei ka jaka ba kin hiar bad kiew kali bad ym dei ba kin shu hiar ne kiew kulmar na kino-kino ki jaka bad ban sngewthuh ruh na kano ka bynta ne ka liang ban hiar ne kiew kali.
“To ngin ïatrei ryngkat bad ngin burom iwei-ïa-iwei pat bad ban don ka jingkitkhlieh namar nga ngeit skhem ba kane ka dei ka daw kaba ngi la thaw hi lyngba kane ka jingeh”, la ong u Bah Adelbert.
Ha kajuh ka por, utei u nongmihkhmat u la kyntu ruh ïa ki pulit kiba pynïaid kali ba kim dei ban kynnoh beit tang ïa kata ka jingduna ki briew ha ka ban pynïaid ïa ki kali hynrei ka dei ka kam kaba la pynkhamti ha ki ban trei bad ki dei ban don ïa ka jingkitkhlieh haba trei ïa ka kam.
“Nga kwah ban pynkynmaw ruh ba ka tnat pynïaid kali jong ki pulit kam dei ban shu ong ba ki duna briew ha ka ban pynïaid ïa ki kali hynrei kane ka dei ka kamram ba la pynkhamti ba phin hap pynbiang na ka liang jong phi”, ong u Bah Adelbert.
Shuh-shuh u Bah Adelbert u la ong ba na ka liang u nongïalam ka kynhun ki nongñiah taksi kamai kata u Bah Wandonbok Jyrwa u la ai ka jingkular ba na ka liang ka kynhun kan mih shakhmat ban ïatreilang bad ka tnad pulit kaba pynïaid kali ha kaba kan thung da ki briew ki ban khmih ban pyntikna ba ha ki thaiñ ka Mission Compound, yn nym shah shuh ban pynhiar ne pynkiew ïa ki nongshong kali na katei ka bynta namar kane ka la wanrah ka jingdheng kali kaba jur bha ha kitei ki bynta.
