Shillong, Risaw 01
Ka jingpynkhreh ban pynlong ïa ka ‘Durga Puja’ ka la nang ïaid shakhmat ha kaba la sakhi ba ki riewngeit Hindu ki la sdang ban pynïeng ïa ki Puja Pandal ha kylleng ki shnong bad ki jaka bapher-bapher kiba ki riewngeit Hindu ki don. Kane ka jingpynïeng ïa ki Puja Pandal ha kylleng ka nongbah Shillong ka lah ban ktah ïa ka ïaid ka ïeng khamtam eh ka jingdheng kali.
Kumba la sakhi ha ki snem bad por ba la leit, ka jingpynïeng ïa ki Puja Pandal ka la ktah shikatdei eh ha ka ïaid ka ïeng ki kali ha kaba ka la ju wanrah ïa ka jingdheng kali kaba jur bha ha kylleng ka nongbah Shillong.
Halor kane kajuh ka bynta, na ka liang Hynñiewtrep National Youth Front (HNYF) East Khasi Hills District hapoh ka jingïalam jong u President, u Bah Steve Raymond Khyriem, ka la leit ban buh da ka dorkhas ha ka Deputy Commissioner (DC) ka East Khasi Hills District, ka Kong R M Kurbah ha ka 1 tarik u Risaw 2024 ba kan tuklar lem halor kane.
Ha ka dorkhas ba la aiti ha ka DC, na ka liang ka seng ka la pyntip ba ïa ka lynti na Garikhana sha Umshyrpi la pynkylla sha ka jaka lehniam Puja wat la baroh ki tip ba kane ka dei kawei na ki lynti kaba bun briew tam bad ka jingkhapngiah kaba khlem kut ha ka ïaid ka ïeng.
Namar kata, na ka liang ka seng ka la ong ba kan ym shah satia ba ïa ka jinglehniam Puja yn leh hapdeng kane ka lynti ka syngkieñ bad ong ruh lada ym don ba shimkhia mardor halor kane, na ka liang ka seng kam banse ban shim noh da kiwei ki lynti ne sienjam.
