Shillong, Risaw 02
Ka Sengkmie jong ka synjuk ki nonghikai SSA na ka Jylla kiba don hapoh ka shatri jong ka Meghalaya SSA School Association (MSSASA), ha ka 2 tarik u Risaw 2024 ki la pynlong da ka jingïakynduh lang jong baroh ki nonghikai SSA na ka Jylla ba la pynlong ha madan Student Jaïaw na ka bynta ban shim ïa ki rai halor ka jingdawa ban kyntiew ïa ka tulop bad ban pynskhem kam pura ïa ki nonghikai SSA.
Haba kren sha ki lad pathai khubor ha katei ka sngi, u President ka synjuk, u Bah Aristotle C Rymbai u la ong ba na ka liang ka kynhun ka dawa ba ka Sorkar ka dei ban shimkhia ban leh eiei halor ki jingdawa jong ka kynhun hapoh ar bnai lym kumta na ka liang ka kynhun kan hap ban shim noh da kiwei ki sienjam kiba tyngeh.
“Ngin ai por ïa ka Sorkar ar bnai ka ban sdang naduh ka sngi ba ngi leit ban buh ïa ka jingthoh ba kan pyndep ïa kine ki jingpynkhreh ïa kane ka ‘Cabinet Memorandum’ napoh ka tnad pule-puthi bad ba kan phah sha ka Sorkar na ka bynta ban ïoh ïa ka jingmynjur”, ong u Bah Rymbai.
U Bah Rymbai u la ong ruh ba nalor kitei ar tylli ki mat jingdawa kiba la pynsngew ha ka jingïalang, na ka liang ka kynhun ka la rai ban phah da ka jingthoh sha u Myntri Rangbah ka Jylla, u Conrad K. Sangma ban wanrah shwa ïa ka aiñ ne ka ‘Policy’ ban thungkam pura ïa ki nonghikai SSA.
U Bah Rymbai u la ïathuh ba na ka liang ka kynhun ka la dep ban phah da ka dorkhas sha u Dr. Vijay Kumar D, IAS, Commissioner & Secretary ka tnad pule puthi ha ki sngi ba la dep ban buh ïa ka jingdawa jong ka kynhun.
Na ka liang ki nongïalam ka synjuk ha kane ka sngi, ki la shim ïa ka rai ban leit ïakynduh ïa baroh 12 ngut Kynhun Myntri kaba kynthup ruh ïa u Myntri Rangbah ka Jylla ban pynsngew ïa ka rai kaba ka kynhun ka la shim ban kyrpad ïa ki Myntri ba kin wanrah ïa ka kpait saiñ kam ne ‘Policy’ ban pynskhem pura ïa ka kam jong ki nonghikai SSA ha shwa ka 31 tarik u bnai Lber 2026. Nalor nangta la pyntip ruh ba na ka liang ki nongïalam ka synjuk khlem da pynslem, ha ka sngi ba bud kata ha ka 3 tarik u Risaw 2024, kin sa leit ban buh da ka jingthoh halor ki rai kiba ka synjuk ka la shim ha katei ka jingïalang.
Utei u President u la pyntip ba lada ka Sorkar kam lah pynurlong ïa ki jingdawa jong ka synjuk, na ka liang ka kynhun ka la pynbna ba kan pynkhreh da ki jingïakhih ki bym pat ju ïohi hapoh ka Ri India ym kum ki jingïakhih kiba mynshwa.
