Shillong, Risaw 02
Ka jingbym pat biang ki rukom peitbniah bad rukom sumar ïa ka jingpang bampong ha kane ka Jylla ka la pynlong ïa kiba bun ki briew ba kin leit wad lad na ki jaka sumar kiba kham biang kiba don shabar Jylla.
Ïa kane la kubur da ki nongsumar kiba don ha kane ka Jylla ha kaba ki la batai ruh ïa ka jingbym pat biang ka jaka sumar ïa kiba ïoh ïa ka jingpang bampong.
La ong ba ki longïing kiba dang kot bor ban leit phah sumar shabar Jylla, kim hun satia ban phah sumar ha Shillong namar wat ka jaka sumar jingpang bampong ha Shillong Civil Hospital bad North Eastern Indira Gandhi Regional Institute of Health and Medical Sciences (NEIGRIHMS) kim pat biang.
Haba ïoh ban ïakren bad ki bahaïing jong katto-katne ngut kiba ïoh ïa kane ka jingpang, ki la ïathuh ba bun ki briew hadien ba ki la ïoh ïa ka kaiphod peitbniah ha Jylla kaba pyntikna ba la ïoh ïa ka jingpang bampong, ki leit khnang shabar Jylla ban twad jingmut kham bniah na ki jaka sumar kum ha Guwahati bad Vellore namar ki jaka peitbniah ruh ki la kham biang bad ki rukom sumar ruh ki la biang lada ïanujor bad ki jaka sumar ha Jylla lajong. Ki la ong ba ha CMC Vellore lei-lei ka rukom peitbniah ïa ka jingpang ka kham bniah bad ki shnat ban sumar bampong ruh ki la biang bad ki doktor jong ki shnat jingsumar ki da ïaphylliew jingmut kumno ban sumar haba la ïoh ka jingpyntikna ba ka dei ka bampong.
“Ka PET Scan kaba batai ïa ka jingsaphriang ka bampong ka dei kaba donkam ha shwa ban ïaid ka jingsumar bad ki doktor kiba dei na ki shnat sumar bampong kum ka Radiation, Medical and Surgical ki shong jingïalang ban phylliew jingmut ban rai lang ha kaba ïadei bad ka rukom sumar. Kane ka dei kaba ngi lap haba phah sumar shabar Jylla khamtam kum ha CMC Vellore,” la pynpaw iwei na ki bahaïing jong kiba pang bampong.
Kiba bun ki briew kiba phah leit sumar shabar Jylla ki ai jingmut ba ha Meghalaya donkam ban shimkhia ïa ka rukom peitbniah bad rukom sumar namar ka bampong ka la jyllei haduh katta-katta.
Kumba ka long mynta, ki jaka sumar bampong ha Meghalaya kim pat don ka PET Scan bad ki doktor ruh ki don tang kiba sumar ïa ka Radiation bad General Surgery hynrei ym pat don ki Medical Oncologist bad kiwei kiwei ki lad jingsumar.
