Shillong, Risaw 02
Ha Mizoram, ka Sorkar Jylla ka la pynrung ïa ka kam ïalehkai bapher-bapher hapoh ka ‘Skill Development’ khnang ba ki nongïalehkai kin ïoh ki jinghikai pyntbit bad kin lah ban jop ha ki jingïakob bapher-bapher kynthup ynda ki mihkhmat ïa ka India ha ki jingïalehkai kum ka Olympics.
Haba ïashim bynta ha ka North East Skill & Entrepreneurship Con-clave kaba la pynlong ha IIM Shillong, Umsawli ha ka Sngi Ba-ar, u Myntri uba peit ïa ka kam ïalehkai bad ïa ka tnat Labour, Employ-ment, Skill Development & Entrepreneurship (LESDE) ka Sorkar Mizoram, u Lalnghinglova Hmar u la ong ba ka Sports ka dei ka karkhana bad na ka bynta ban lah ban lehbha donkam ïa ki buit lyngba ki jinghikai pyntbit (skills).
U la ong ba kano-kano ka jait jingïalehkai khlem ka jingai jinghikai pyntbit ïa ki nongïalehkai kin ym lah ban jop ha ki jingïakhun.
U la ong ruh ba ka Sorkar Mizoram ka ñiew ïa ka kam ïalehkai kum ka kawei na ki lad ïoh kam bad lad kamai ha kaba ki samla ki donkam ban don ki jingtbit (skills).
Une u Myntri ka Sorkar Mizoram u la ong ba ka India kaba dei ban ïashim bynta ha ki jingïalehkai sports bad kiwei pat ki ri ka pyrthei kan ym lah ban ïakob bad ban jop lada kiba leit ïashimbynta kim don ïoh ka jinghikai pyntbit.
“Kumta ka jingtbit ka donkam ha kino-kino ki jait jingïalehkai bad kata kan wan lyngba ka jingshah hikai. Lada ka India kan pdiang ban pynlong ïa ka Olympics ha u snem 2036, kito ki ban shahjied ban ïashimbynta kat ha ka Olympics ban mihkhmat ïa ka ri ki dei ban long kiba tbit kumba long lem ki nongïalehkai na kiwei pat ki ri, USA, China bad kiwei kiwei,” la ong u Lalnghinglova Hmar.
“Namarkata u la ong ba ka Sorkar Mizoram ka kyrpad ïa ka Sorkar Pdeng ban kyrshan ïa ka Jylla ha ka liang ka Skill Development bad u la kyrpad ïa u Myntri Khynnah ka Sorkar Pdeng, u Jayant Chaudhary uba peit ïa ka tnat Skill Development ban pyrkhat lang ïa kane na ka bynta ka jingmyntoi ki samla kiba dei ban shah hikai pyntbit ha kiba bun ki bynta.
Ha kawei pat ka liang, u Myntri ka Sorkar Meghalaya uba peit ïa ka tnat ïalehkai bad ka tnat Labour, Employment & Skill Development, u Bah Shakliar Warjri u la pynpaw ba ka Sorkar Jylla ka donkam ïa ki ITI ban nang kham pynkhlaiñ khnang ban ïoh ai jinghikai pyntbit ïa ki samla pule ha ki kam bapher bapher bad kin trei ne sengkam lajong.
U la kyrpad ruh ïa u Myntri Khynnah ka Sorkar Pdeng ba lada long kaba lah ban kyrshan ruh ïa ka Jylla ban shna ïa ki jaka sah (hostel) na ka bynta ki samla pule kiba leit pule ban shah hikai pyntbit ha ki ITI khamtam ha nongbah Shillong kiba wan ki jaka bajngai.
U Bah Shakliar u la ong ruh ba ka jinghikai pyntbit ïa ki samla ka dei hi ka thong ban pynmih ïa ki kam bad ban seng kam.
Une u Myntri u kyrpad ruh ïa ka Sorkar Pdeng ba haba thaw ïa kino-kino ki ‘guidelines’ lane ki kyndon kiba batai ban pyntreikam ïa ki skhim namar ki kyndon ki don ki bym ïahap katkum ba la shna da ka Sorkar Pdeng hynrei ki don ki jingïapher katkum ka jinglong jong ki Jylla.
