Shillong, Risaw 01
U General Secretary ka HSPDP, Bah Panbor Ryntathiang u la pyntip ba ka HSPDP kan sa shong ïa ka Central Executive Committee (CEC) ha ka 9 tarik Risaw 2024 ha Shillong na ka bynta ban ïakren ïa ka ilekshon MDC ha Khasi Hills Autonomous District Council bad Jaiñtia Hills Autonomous District Council (JHADC).
Haba buddien ïa ka jingpynkhreh ïa ka ilekshon MDC, u nongthoh khubor u la ïoh ban ïakren bad u Bah Panbor lyngba ka phone uba la ïathuh ba haduh mynta ym pat don ki ‘riew rangbah na ki jylli ne konstitwensi ba kin pan tiket.
U la ïathuh ba ka jingbym pat don kiba kwah tiket ka lah ban dei ba ka HSPDP kam pat ai jingtip sha ki nongkitkam jong ki jylli.
U la ong ba ka 9 tarik mynta u bnai ka jingpynkhreh ïa ka ilekshon MDC kan dei ka mat kaba nyngkong ban ïakren.
“Ngin sa tip mano ba pan tiket ha ka ilekshon MDC dei tad ynda la phah jingtip sha ki nongkitkam jong ki jylli,” u la ong.
Kum ban shu kdew ba ka UDP bad NPP kiba dei ki seng kiba synshar ïa ka sorkar jylla ki la dep aipor haduh ka 30 tarik Nailur 2024 ïa ki Block ne Jylli ba kin pyntip noh sha ki nongkitkam jong ki District khnang ba kin phah pat ïa ki jingtip sha ki nongkitkam jong ka Sengkmie.
Kum ban shu pynkynmaw ki nongïalam ka UDP bad NPP na East Khasi Hills ki la ïathuh ba haduh ka 30 tarik u Nailur 2024 ki don ki konstitwensi ki bym pat phah ïa ki kyrteng jong ki jylli khamtam ha ki jaka bym don MDC hynrei ki kyrmen ba mynta u bnai kin sa phah lut.
Kane ka jingwad kyrtong ka UDP bad NPP kiba don ha ka bor synshar ha ka sorkar jylla la sngewthuh ba ïa ka ilekshon MDC ha KHADC bad JHADC kan long beit mynta hapoh kine hynriew bnai.
