Shillong, Risaw 02
Khnang ban tehlakam ïa ka jinglaitlan ki nong-khaïi drok bad ka jingïoh ïing wai da kaba suk, u MLA ka South Shillong konstitwensi u Bah Sanbor Shullai u la pynbna ban ïakhun tyngeh ïa ka jingkhaïi drok bad ïa ki nongdih drok ha ki jaka kiba hapoh ka konstitwensi jong u bad u la ong ba katkum ka aiñ, ki trai ïing kiba aiwai ïing ïa ki briew kiba donbynta ban khaïi drok kin ngat lang ha ki kyndon jong ka aiñ Narcotic Drugs and Psychotropic Substances Act, 1985.
U Bah Sanbor u la pynbna ïa kane kum kawei na ki rai kaba la shim ha ka jingïalang bad ka Shillong Cantonment lem bad ki bor district bad pulit nalor ki trai ïing kaba la long ha Jhalupara Community Hall ha ka Sngi Balang.
Haba kren sha ki lad pathai khubor hadien ka jingïalang u Bah Sanbor u la ong ba ha kane ka jingïalang la ïakren sani halor ki kam sniew kiba la jyllei hapoh Cantonment naduh ka jingkhaïi drok bad kiwei ki kam sniew, ha kaba u la pynkynmaw ruh ïa kawei ka snar nongkhaïi drok ka Aisha Khatoon kaba la shahkem ha ka sien basaw ha ki pulit dang shen.
U Bah Sanbor u la ong ba kane ka briew ka dei ka ‘mafia’ kaba la pynïar ïa ka jingkhaïi drok jong ka bad ka long kaba donkam ban tehlakam ïa kane ka kam sniew kaba la nang pynbun ïa ki nongdih drok.
Kumta u Bah Sanbor u la ong ba napdeng ki rai kiba bun, kaba kham kongsan ka dei ka jingpynngat lang ïa ki trai ïing kiba aiwai ïing ïa kiba khaïi drok katkum ka Section 25A jong ka NDPS Act.
Shuh shuh u Bah Sanbor u la ong ruh ba ki nongbylla kiba wan nabar Jylla ki donkam beit ban pynshisha lyngba ka tnat pulit na ka shnong bad Jylla kaba ki wan khnang ban tehlakam ïa ka jingwan ki briew kiba la don dak sniew lypa.
Kumta ki trai ïing ki dei ban husiar bad dei ban tohkit bniah ha shwa ban aiwai ïing naduh kiba khaïi drok bad dih drok haduh ki nongbylla kiba wan na kiwei ki Jylla da kaba pyntikna ba ki nongbylla kiba nabar Jylla ki hap ïoh ka jingpynshisha na ki pulit (police verification) na ka jaka kaba ki wan khnang ban tehlakam ïa ka jingwan laitlan ki runar ban sah ha ki shnong ki thaw.
Kiwei kiwei pat ki rai kiba la shim ha kane jingïalang ki long ban thaw ïa ka Joint Committee kaba kynthup ïa ka Cantonment lem bad ki Dorbar Shnong kiba don markhap bad ka Cantonment ban shim lang ïa ki lad ki lynti ban ïakhun ïa ka jingma jong u drok kaba la buh da ki nongkhaïi drok ha kaba yn pynkhlaiñ ïa ka Village Defence Party ban ïakhun ïa ki jingsniew ha shnong ha thaw.
La rai ruh ba ka Shillong Cantonment kan peitngor bha da kaba ïatreilang bad ki Dorbar Shnong kiba don marjan khnang ban lah tehlakam ïa ka jingjyllei ki kam sniew ha thaiñ Cantonment naduh u drok bad kiwei ki kam sniew kiba buh jingma ïa ka imlang-sahlang.
U Bah Sanbor u la pynkynmaw ïa ka jingïatreilang ki Village Council hapoh Cantonment bad ki Dorbar Shnong kiba don marjan bad ka Cantonment ban ïakhun ïa ka jingpang COVID-19 ha kaba ka Sorkar ka la lah ban pyntreikam ïa ki kyndon lyngba ka jingïasnohkti lang jong ka Community COVID-19 Management Team (CCMT).
Namar kata, u la ong ba ha kajuh ka rukom ka jingïatreilang ka dei ban don ha kane ka bynta ban ïakhun ïa ki kam sniew khamtam eh u drok uba la buh jingeh bad jingma ïa ki longïing-longsem bad ïa ka imlang-sahlang.
