Shillong, Risaw 02
Ka Voice of the People Party (VPP) ha ka Sngi Balang ka la pynpaw ïa ka jingsngewkhia kaba jur bad ka jingbym ïahap halor ka rukom pynïaid ïa ki eksamin (competitive examinations) hapoh ka Jylla khamtam ka Megha -laya Public Service Commission (MPSC).
“Ka kynrum-kynram haba ïadei bad ka jingpynïaid ïa ka eksamin Meghalaya Civil Service (MCS) ruh kam pat jah ba la mih sa kawei pat ka kynrum-kynram haba ïadei bad ka jingpynrung kam ïa ki nos,” ong u nongaiktien ka VPP, Dr. Batskhem Myrboh ha ka kyrwoh khubor.
U la ong ruh ba ka MPSC ha kine ki phew snem ba la leit kam shym la lah ban trei kum ka kynhun kaba laitluid ha ryngkat ka jingshaniah bad jingsngewskhem na ki samla wad kam.
Haba kdew ba ka jinglong ba tbit ryngkat ka jingtreikam kaba khuid ba shai ka ïai kiar na kane ka kynhun riti synshar kaba kongsan, u Dr. Myrboh u la ong ba ym tip satia la ka MPSC ka thaw ne em wat ïa ka ‘Moderation Board’/’Committee’ na bynta man la kawei-pa-kawei ka eksamin bad la ka don ne em ka bynta kaba long rieh ban pynlong ïa ka eksamin kaba kyntang.
Ha kajuh ka por, u la ong ba ka dei ka kamram jong ka Sorkar ba mynta ban shim ïa ki sienjam ha ka ban pyntikna ba ka MPSC ka ïoh ïa ka jingshaniah bad jingsngewskhem jong ki paidbah. Ka long kaba kongsan tam ban thung ïa ki briew kiba don burom ha ryngkat ka jingtbit kumjuh ban shimti kum ki Chairperson/dkhot jong ka MPSC, u la ong.
“Dei tad ynda kum kine ki briew ki don ha ka khlieh ka jingtreikam jong ka Commission yn sa lah ban khmih lynti ïa ka jingtbit ha ka jingtreikam kaba paka, kaba khuid ba shai, bad kaba don ka jingkitkhlieh,” ong u nongaiktien ka seng.
Ha kawei ka liang, u la ong ba kane hynrei ka long palat ka jingpan na ka Sorkar (kaba mynta) kaba la ju bna ban ai khusnam ïa ki briew bad ki bahaïing bahasem namar ka jinglong ba ïaineh ïa ka ïing ka sem ba synshar ïa ka NPP.
Shuh shuh u Dr. Myrboh u la bynrap, “Ha kane ka kynrum-kynram ba mynta kaba ïadei bad ka jingpynrung kam ïa ki nos, ka VPP ka kyntu ïa ka MPSC ban sngap bad pyrkhat bha ïa ka jingdawa ba la pynpaw da kito kiba don ka jingsngewkhia halor ki jingbakla ba la kynnoh na ka liang jong ka Commission.”
