Shillong, Risaw:
Ka Toyota Kirloskar Motor (TKM) ka la pyni paidbah ïa ka kali Special-purpose Hilux (ba la pynwandur thymmai da ka jingkyrshan jong ki nongdie na bar) ha ka Himtech 2024 Symposium, ba la pynlong da ka Indian Army ryngkat bad ka FICCI (Federation of Indian Chambers of Commerce & Industry).
Kum ka jingïaid shaphrang sha ka thong jong ka ‘Raksha Atamanirbhata’, bad ban ai jingïarap ïa ka tnad shipai da ki tiar ki tar kiba bha tam bad ki lad ïarap kiba bha, kine ar tylli ki shnat treikam (Indian Army bad ka FICCI) ki la ïatreilang na bynta ka “HIMTECH 2024” da kaba buh ha khmat ban pyndonkam ïa ki kor ki bor teknologi ki shipai na ka bynta ki jaka kiba don sha ki bynta ba kynjang ne ki High Altitude Area (HAA).
Ha kane ka jingpyni paidbah kaba la pynlong ha Rinchen Auditorium Grounds, Leh, Ladakh ha ka 20 bad 21 tarik u Nailur 2024, la sakhi ïa ka jingïadonlang jong ki heh jong ka Army Commands, Air Force, ITBP (Indo-Tibetan Border Police), ki shipai bad kiwei ki heh lem bad ki nongmihkhmat ka TKM. Haba kren shaphang ki jingmut jong u, u V. Wiseline Sigamani, Vice President ka Strategic Business Unit (North) jong ka Toyota Kirloskar Motor u la ong, “Katba ngi nang ïaibteng ban pynmih ïa ki buit thymmai bad pynïar ïa ka jingpynmih jong ngi ïa ki tiar ki tar, ngi ïaineh ban trei shitom ban ai jingkyrshan ïa kum kine ki jait jingdonkam ba kham pher katba ki nang ïai mih sha khmat”
