Shillong, Risaw 02
U President jong ka Meghalaya SSA School Association (MSSASA), Bah Aristotle Rymbai, u la ong ba ka Ri India ka dei ka Ri kaba laitluid bad kaba ailad ïa uno-uno u briew ba un thaw ïa ka seng.
Haba kren sha ki lad pathai khubor ha ka 2 tarik u Risaw 2024 kaba dei ruh ka sngi sdang jong ka jingïakhih ki nonghikai SSA kiba don hapoh ka shatri jong ka Meghalaya SSA School Association (MSSASA) ha madan Student, Jaïaw ha kaba ïadei bad ka jingïakhih kaba dang shu dep pynlong shen da ka seng ki nongtrei SSA kiba la dawa na ka Sorkar Jylla halor ka bhah 80%, u Bah Rymbai u la ong ba kum ka seng ki nongtrei SSA ki tip kham bha ma ki halor ki mat kiba ki la pynsngew sha ka Sorkar. U la ong ba na ka liang ka kynhun ki nonghikai SSA pat ha ka nongrim jong ar tylli ki mat, ka la jied ban pynsngew sha ka Sorkar halor ka jingpynskhem pura ïa ki nonghikai SSA ha kam jong ki.
“Ha kaba ïadei bad ka jingdawa jong ki ïa ka bhah, na ka liang jong ngi te ngim don eiei ban ong”, ong u Bah Rymbai.
U Bah Rymbai u la pyntip ruh ba ha ki por ba mynshwa, ki nonghikai bad ki nongtrei SSA ki lah don lang ha kajuh ka lama hynrei na ka jingmih ki daw bym ïasngewthuh jingmut hapoh ka seng, kumta ki la rai ban mih noh na ka seng ki nonghikai bad ban thaw noh la ka jong ka seng.
U Bah Aristotle u la pynshai ba ka jingdawa jong ka seng ki nonghikai SSA na ka Sorkar ka long ban pynkiew ïa ka tulop bad ban pynskhem ïa ka kam jong ki, bad ha ka jingïoh ban ïakynduh ïa ki ophisar jong ka tnad pule pulthi ka Sorkar Jylla, ki la kren shai ba na ka liang ka tnad pule-puthi napdeng ki ar tylli ki mat jingdawa jong ka seng, ka la pynkreh ïa ka ‘Cabinet Memorandum’ na ka bynta kumno ban peit bniah ïa ka rukom treikam jong ki nonghikai.
“Kane ka mut ba ka Sorkar ka la pynkhreh ban wanrah ïa ka ‘Policy’ kumno ban pynskhem ïa ka kam jong ki nonghikai SSA bad ïa kato kawei ka mat jingdawa haba ïadei bad ka jingkyntiew tulop, na ka liang ka Sorkar ka la dep kren shai ba mynta ka Sorkar kan wanrah shwa ïa ka ‘Policy’ kumno ban pynskhem ïa ka kam jong ki nonghikai SSA”, bynrap u Bah Rymbai.
Na ka liang u Bah Aristotle u la pyntip ruh ba kane kam dei ha ka sien kaba nyngkong ba ka seng ka hap ban ïakhun marwei bad ha kaba kut ki sngi, ki paidbah ki la sakhi ba ka Sorkar ka jubab bad ka sngap ïano da kaba bynrap ba kin ieh ha ka jingstad jong ka Sorkar ba kan bishar bad shim ïa ka rai.
