Jowai, Risaw 01
U District Magistrate jong ka West Jaiñtia Hills District u la pynmih ïa ka hukum katkum ka kyndon 163 jong ka BNSS na ka bynta ban pynneh pynsah bad ïada ïa ka wah Myntdu bad ka jaka lum um jong ka.
Katkum kane ka hukum, la khang ban tih khyndew bad ban tih maw ha baroh shilynter ka wah Myntdu bad harud wah.
Ka hukum ka la khang ruh ban sait ïa ki jaiñ bad ki kali, ban bret ïa ki mar lyngkhot bad ki mar jaboh (Solid/Liquid) ha shilynter ka wah Myntdu bad ki jaboh na ki jingshna surok shapoh ka wah Myntdu.
La khang ruh ban bret ïa ki diaper bad ki sanitary pad ha ka wah Myntdu. Ïa kane ka hukum la pynmih kum ka jingbteng ïa ka hukum kaba la pynmih mynshuwa katkum ka kyndon 144 CrPC Dt. 26/06/2024.
Ka hukum ka la long kaba donkam namar ka jinglong ka um ha ka wah Myntdu ka la shah ktah jur namar ka jingtwa khyndew bad ka jingtuid khyndew ha ka wah. “Baroh kine ki la pynlong ïa ka jingjaboh kaba jur jong ka wah bad ruh ka jingjaboh jong ka umbam umdih jong ka sor Jowai baroh kawei,” la ong ka hukum.
