Khliehriat, Risaw:
Ka District Swachh Bharat Mission (Gramin), East Jaiñtia Hills District ha ka 24 tarik Nailur ka la pynlong ïa ka jingthung tynrai dieng ne ‘Tree Plantation Drive cum Awareness Program’ halor ka phang ‘Waste Recovery’ ne ka jingpyndonkam biang ïa ki jaboh jabaiñ kaba long shibynta ka Swachhata Hi Seva Campaign 2024.
Ïa kane ka prokram la pynlong ha Latyrke Community Hall, Latyrke, East Jaiñtia Hills District ha ka jingdonlang ka MLA Sutnga-Saipung, ka Kong Santa Mary Shylla kum ka kongsan, u Deputy Commissioner ka East Jaiñtia Hills District, u Shivansh Awasthi, u Executive Engineer, Electrical Division, Jowai cum Member Secretary, District Swachh Bharat Mission (Gramin), East Jaiñtia Hills District Paul Synnah nalor kiwei kiwei ki ophisar sorkar bad ki nongshong shnong.
Ha ka jingïalang ka Kong Santa Mary Shylla ka la plie paidbah ïa ka Waste Recovery Centre bad kawei ka Additional Classroom ha Latyrke Secondary School.
Ka Kong Santa Mary Shylla ha ka jingkren ka la ïaroh ïa ki nongshong shnong ka shnong Latyrke halor ka jingtreilang jong ki ban pyndonkam ïa ka pisa jong ka DMF bad lah ruh ban pyndep ïa ki ar tylli ki projek kata, ka jingtei ïa ka Waste Recovery Centre bad ka Additional Class Room ha Latyrke Secondary School.
Ka Kong Shylla ka la kren ruh halor ka jingkhluit jong ka pyrthei da kaba pynshlur ruh ïa ki nongshong shnong ïa ka jingdonkam jong ka jingthung dieng bad ban pynneh-pynsah ïa ka mariang. Nalorkata ka la kren ruh halor ka jingkhuid-jingsuba ym tang ha ki ïing ki sem hynrei wat ha ka imlang-sahlang ruh.
Katba u Deputy Commissioner ka East Jaiñtia Hills District, u Shivansh Awasthi u la pyntip ba ïa ka Swachhata Hi Seva la plie ryngkat ka jingïohi jngai jong u Mahatma Gandhi ban pynlong ïa kawei pa kawei ka shnong kaba khuid bad ruh ban kyntiew ïa ka ïoh ka kot ha ki thaiñ nongkyndong.
U kyrmen ruh ba lyngba ka jingplie ïa ka Waste Recovery Centre kan ym ïarap tang ïa ki nongshong shnong ban pynkhuid ïa ki sawdong sawkun jong ki hynrei kan ïarap ban pynmih pisa lyngba ka jingpynïakhlad ïa ki jaboh.
U Awasthi u la kyntu ruh ïa ki nongshong shnong ban ïaleh ban pynïakhlad ïa ki jaboh ha ki ïing ki sem ki jong ki bad kumjuh ban ïatreilang bad ki nongïalam shnong khnang ban ïoh ïa ka jingmyntoi kaba paka tam na ka Waste Recovery Centre.
Kiwei kiba la ai jingkren ki long ka District WASH (Water, Sanitation and Hygiene) Co-ordinator, Embhah Rymbai, Jal Shakti Fellow Patricia, Law and District Co-ordinator, District Swachh Bharat Mission (Gramin), East Jaiñtia Hills District, Damonlangki Dkhar.
