Shillong, Risaw 02
U MLA ka BJP na South Shillong konstitwensi, Bah Sanbor Shullai u la bynñiaw namar ka jingsynjor palat ki aiñ kiba ïadei bad ka rukom bishar ha India ha kaba u la ong ba wat uba la dep phla ba pynïap ruh u dang ïoh jamin.
U Bah Sanbor u la pynpaw ïa kane ka jingbynñiaw ha ka 2 tarik Risaw 2024 haba kren shaphang ka jingjyllei ki kam sniew ha ka imlang-sahlang naduh ka jinglaitlan kiba khaïi drok bad dih drok bad wat ki nongpynïap briew kiba la phla ba ki leh ïa ka kam runar ki dang ïoh jamin.
U Bah Sanbor u la ai nuksa ïa ki aiñ bad rukom bishar kiba pyrkhing ha kiwei ki ri ha kaba ki briew kiba la dep lap ba ki leh ïa ki kam runar ki ngat beit ha ka saja khlem da pynslem ïa ka por la ka dei da kaba rai pynrem ban shu dien phasi ne shah set baroh shirta.
Kumta u la ong ba ka por ka la biang bha ban pynkylla noh ïa ki aiñ kiba ïadei bad ka rukom bishar bad un sa pynsngew sha u Myntri Rangbahduh ka ri, u Narendra Modi ba ka Sorkar Pdeng kan wanrah noh ha Parliament ban pynkylla ïa ki aiñ khnang ba kan don ka jingpynkhlaiñ ïa ka rukom bishar ha India.
U Bah Sanbor u la ai nuksa ruh ïa ki ri kum ka Singapore bad Afghanistan ha kaba ki aiñ ïa kiba leh kam sniew ki long kiba pyrkhing ka rukom bishar ka long kaba sted ban pynshitom ïa kito kiba la tikna ba ki donkti ha ki kam runar ne kam sniew.
Hynrei u la ong ba ha India, wat kito kiba la dep lap ba ki donkti la bunsien ha ki kam sniew ki dang ïoh jamin bad ka jingbishar ban rai pynrem ïa kiba donkti ka long kaba slem bad shimpor.
