Nongstoiñ, Risaw 02
Ha ka 2 tarik mynta u bnai ki pulit ki la lap noh ïa kawei ka met ïap jong uwei u rangbah na ki bynta jong kawei ka wah kaba la ju khot Wahriat kaba don sha tbian jong ka jingkieng heh ka sor Nongstoiñ.
Katkum ka tyllong khubor, la ïathuh ba utei u rangbah uba la khlad noh u dei ba la tip kyrteng kum u Bah Herbert Mawlieh, 39 snem ka rta na ka dong Them-ïew jong ka shnong New-Nongstoiñ.
Ka tyllong khubor na ki pulit ka la ong, ha kaba ïadei bad utei u rangbah, ki pulit ka Nongstoiñ ha ka 30/09/2024 ki la ïoh pdiang ïa ka jingujor ba u Bah Herbert Mawlieh u la jah rngai noh na la ïing naduh ka 28/09/2024 bad la ïohi khatduh ïa u ha ka shnong New Nongstoiñ ha katei kajuh ka sngi ha kaba u la ïeh noh ïa la ka mobile phone ha ka kali kaba u ñiah namar u dei u nongñiah kali ba ju kamai auto trok ha ïew Nongstoiñ. Hynrei ha ka 2 tarik pat la lap noh ïa ka met ïap jong u na Wahriat Nongstoiñ bad mar ïa ïoh jingpyntip, na ka liang ki pulit ruh mar-mar ki la hiar sha katei ka jaka ban khwai ïa ka met bad ruh ban pynlong ka jingtohkit. Shuh shuh la ong ruh ba na ka liang jong ki pulit hadien ba ki la pyndep ïa baroh ki jingdonkam katkum ka aiñ ha katei kajuh ka jaka ba la lap ïa ka met ïap, la pynkit noh ïa ka met sha Civil Hospital Nongstoiñ bad la dep ruh ban pynrung ïa ka mukotduma.
