Nongstoiñ, Risaw 02
Ka jingïai peitngor bad ka jingïai pynlong ka tnat pulit ka West Khasi Hills ha ryngkat ka jingïatreilang bad ki VDP, ki pulit ka Anti Narcotic Task Force ka West Khasi Hills kumjuh ruh na ki VDPCNA ïa kiba bun ki kam sniew ha ki bynta bapher bapher jong ka sor Nongstoiñ khamtam ha ki bynta ka ïew Nongstoiñ ka la pynlong shisha ka jingshngaiñ ïa ki ba bun ba lang.
Lah ban kdew ha kine bnai ba la dep, ka jingmih bad ka jingkynrei jong ki kam sniew naduh ki kam tuh kam thiem, ki jingshah lied ki dukan, ka jingkynrei jong ki nongdie bad nongdih drok hapoh ka sor ka la nang jur na kawei ka sngi sha kawei pat kaba la pynlong ruh ka jingsyier wat ïa ka ïaid ka ïeng.
Katkum ka tyllong khubor ba la ïoh lum, la ïathuh ba mynta ban teh lakam ïa ka jingïai kynrei jong ki kam sniew hapoh kane ka sor, na ka liang ka tnat pulit jong ka West Khasi Hills man ka sngi bad kumjuh ruh ha ka por mynmiet ki la pynlong ïa ka jingpahara bad ka jingpeitngor kaba jur wat ha ki bynta jong ka ïew Nongstoin bad ym tang hapoh ka sor Nongstoiñ hynrei wat ha ki bynta jong ka surok Nongstoiñ Bypass.
Ki nongshong ïew, ki bym shym la kwah ban pynpaw kyrteng haba ïakren bad u nongthoh khubor halor kane ka phang, ki la ïathuh ba mynta haba ki shong dukan khamtam hapoh ka ïew Nongstoiñ ki la kham don ka jingsngew shngaiñ ban ïa nujor bad ki por ba la leit.
Kine ki nongshong ïew ki la kyntu ïa ka tnat pulit ba kan nang ïai shimkhia ban pynlong ïa ka jingpeitngor ïa kiba bun ki kam sniew, kumjuh ïa ka jingkynrei ki kam drok hapoh kane ka sor khnang ba ki kam sniew kin nangduh jait bad kin nym kha roi na kawei ka por sha kawei pat.
