Shillong, Risaw 02
Ar ngut ki briew ki la shah kem noh ha ki pulit bad na ka met jong ki la ïoh ban kurup ïa u drok ba la suba u heroin uba khia kumba 8.28 gram.
Katkum ka khubor ba la ïoh na ki pulit la ong ba ha ka 28 tarik mynshem bnai, ki pulit hadien ka jingïoh ïa ka jingtip kaba bniah, ki la ïoh ban bat noh ïa kawei ka kali kaba don ïa u nombor AS01-JC-9382 ha ka thaiñ Masangpani ha West Garo Hills kaba la shong da ar ngut ki briew.
Kine ki briew kiba don hapoh ka katei ka kali ki dei kiba la tip kyrteng kum u Samuel Abedin (25 snem) bad u Sofiqul Islam (30 snem). Na kine ar ngut la ïoh ruh ban kurup haduh shiphew tylli ki tyndong ba la thep bha ïa u drok ba khia 8.28 gram, lai tylli ki mobile phones, ka pisa kaba long T.235 bad kiwei kiwei.
