Shillong, Risaw 03
Ka Myntri ka Sorkar Jylla ka Kong Ampareen Lyngdoh ka la ong ba ka jingkynthoh pyrshah halor ka jingbynshet ïa ka MP barim ka Tura, ka Agatha K Sangma kum ka Chairperson ka State Commission for Protection of Child Rights (SCPCR) ka long kaei-kaei kaba pynpyrkhat bad kaba hap buh jingkylli kylla ïa kiba kynthoh pyrshah.
Ka Kong Ampareen ka la ong ba ka Agatha kum ka MP barim bad kaba la shakri kam paidbah la 15 snem tam ka long kaba bit ban bat kam namar ka don ruh ka kyrdan bad jingshemphang ban ïalam ïa ka SCPCR.
“Nga kwah ban kylli ïa kiba kynthoh ba ka dei ka jingbynshet kaba shu jied bahaïing. Hato ym long bat kam mo tang namar ba wan na ka ïing kaba don ha ka synshar-khadar ne ba dei shipara, khun ne hynmen para jong kiba don ha ka saiñ hima?” la kylli ka Kong Ampareen.
Ka la ong ba tang namar ba ka Agatha ka dei shipara bad u Myntri Rangbah, hato ym long shuh mo ban bat kam ban ïalam ïa ka Commission.
Ka la ong ba kiba don ka kyrdan bad kiba la shakri ïa ki paidbah ki long kiba bit ban bat kam bad ym lah ban shu kynthoh pynrem tang namar ba ki dei kiba wan na ka longïing kaba donbynta ha ka saiñ hima-sima bad ka synshar-khadar.
Kumta ka Kong Ampareen ka la ong ba ka kren kum ka nongshong shnong bad kam pdiang ïa kum kine ki jingkynthoh kiba kren beiñ ïa kiba wan na ka longïing kaba la donbynta ha ka kam shakri paidbah.
