Tura, Risaw 03
Ka kynhun jong ki nongrahbor ka la hap ban ieh noh ha khlaw ïa uwei u briew ba ki la rahbor hadien ka jingtip jong ka jingpynjur ïa ka jingkhynra da ki pulit ban thwet ïa kine ki briew.
Uwei u nongshong shnong ka Assam, u Amit Kumar Singha, uba la kit ïa ki ar ngut ki briew ha ka kali ka jong u, u la lait phet na ka kti jong ki nongrahbor hadien ba ki la ieh noh ïa u ha kawei na ki jaka khlaw namar ka jingpynjur khynra da ki pulit ha ki bynta jong ka Dadenggre Civil Sub-Division. Hadien kane ka jingïoh phet, ki pulit ka West Garo Hills ki la lap noh ïa une u briew.
Katkum ka tyllong khubor na ki pulit, la ong ba ki ar ngut ki briew ki la wan sha u Amit Kumar ha Khanapara bad ong ban shim wai ka kali ban leit buh ïa ki sha Singimari ha South Salmara, Assam. U Amit Kumar u dei u nongshong shnong ka Nityanandpur, Hailakandi, Assam bad u la shah rahbor naduh kine ki phra sngi kiba la leit, ha kaba la pynrung ïa ka mukotduma ha Dispur.
Katkum ka khubor, u Amit Kumar hadien ba u la lait na kti ki nongrahbor, u la ïathuh ba phra sngi mynshwa, ar ngut ki briew ki la shim wai ïa ka kali jong u na jaka ïeng kali ha Khanapara ha ka por 2:30 nohphai sngi ban leit sha Singimari bad ki la ïakren ha ka ktien Bengali. La ong ba hadien ba ki la mih, ki la sangeh ha ka jaka theh umphniang ha Azara ban theh umphniang bad hadien ba la mih nangne bad ïaid katto-katne, la kiew sa lai ngut ki briew bad kham hadien ki la tan jubor ïa une u briew sha kawei ka jaka bym lah ban ithuh, ha kaba la wan synran sa kawei pat ka kali Alto rong lieh (AS01-BB-5510 ryngkat bad sa lai ngut kiwei pat kiba la suba ba ki dei ki nongshong shnong ka rilum Garo.
La ong ba hadien ba la dep pynrung mukotduma, la sdang ka jingtohkit bad ha kaba la lap ïa ka jaka jong une u briew ba shah rahbor ha ki bynta jong ka Dadenggre civil sub division.
Haba pyntip halor kane ka jingjia, u Acting Superintendent of Police ka WGH u Jerry Marak u la ong, “Ïa u Amit Kumar la pynkynriah noh ha ka kali Alto bad kiwei ki kali ki la bud nadien. Hadien kane, la buh ïa u ha kawei na ki jaka khlaw haduh hynñiew bad phra sngi ha ki bynta ka rilum Garo hynrei la ong ba hynnin ka sngi, u Amit u la ïohsngew ïa ka jingïakren ki nongrahbor halor ka jingdon jong ki pulit ha ka thaiñ bad ha ka step kaba bud, u Amit u la lap ba kine ki briew kim don hajan jong u, kumta u la shim kabu ïa kane bad phet noh na katei ka jaka bad kham hadien la lap noh da u OC Damal Asim na ka ïingsah jong u Nokma ha Baljek Aduma, ha kaba u la rieh tngen.”
“Ngi la ïoh pdiang ka jingpyntip halor ka jingdon jong ka kynhun ki nongrahbor na Assam bad ruh u nongshah rahbor, ha kaba la pynlong ïa ka jingkhynra kaba jur ha ki bynta bapher bapher. Hadien ba ki nongrahbor ki la bna ïa ka jingdon jong ki pulit kiba ïaid sharum shaneng ha kane ka thaiñ, ki la ieh noh ïa utei u briew ba ki la rahbor bad phet krad. Kumta hadien ba une u briew uba la shah rahbor, u la ïohi ba ym don ki briew kiba pahara ïa u, u la phet krat na katei ka jaka bad poi sha ka shnong ba marjan ban rieh,” la pyntip u SP.
Wat la ki la ïoh pyllait ïa utei u briew hynrei haduh mynta ym pat ïoh ban kem ïa ki briew kiba donkti. Kumta ki pulit ki dang thwet jur ïa katei ka kynhun jong ki nongrahbor bad la suba ba ki lah ban dei kiba kynthup na Assam bad Meghalaya.
