Shillong, Risaw 03
Ka Khasi Students’ Union (KSU) ka la ai jingmut bad ban jur ba ha ka State Reservation Policy ba thymmai ne ka bhah thungkam thungkam ka Jylla dei ban mynjur 50 persen na ka bynta ki Khasi-Jaiñtia, 40 persen sha ki Garo, 5 persen sha kiwei ki Scheduled Tribe bad 5 persen sha ki Unreserved Category.
Ïa kane ka jingban jur na ka liang jong ka KSU ka la buh hakhmat ki dkhot ka Expert Committee on the State Reservation Policy, ha ka Public Hearing kaba la pynlong ha ka Sngi Palei ha State Convention Centre, Shillong.
Haba kren sha ki lad pathai khubor hadien ba la mih na ka jingïalang, u General Secretary ka KSU u samla Donald V Thabah u la ong, “Ha ka jingïakren jong ngi bad ka Expert Committee, ngi la ai jingmut ba lada ïaid jingai bhah katkum ka jingdon paid, ngi sngew ba ka jingsam bhah hapdeng ki Khasi bad ki Garo ka dei ban long 50 persen ïa ki Khasi-Jaiñtia bad 40 persen ïa ki Garo, 5 persen ïa kiwei ki ST bad 5 persen ïa ki unreserved category.”
U samla Donald u la ong, ha kane ka jingïalang, ka seng ka la buh ruh hakhmat ïa kawei pat ka jingpynsngew, ka long ba lada ïa kane ka jingtyrwa ba la ban kam lah ban urlong, kumta ïa ka jingai bhah dei ban long noh 90 persen kyllum lang na ka bynta ki Khasi, Jaiñtia bad Garo, 5 persen ïa kiwei ki ST bad 5 persen ki Unreserved.
Une u nongïalam ka KSU u la pyntip ruh ba ka seng ka la ai jingmut ba “Lada dei ban pynmih ïa ka Reservation Policy ba thymmai, ka policy kam dei ban treikam naduh ki snem ba la leit noh, kam dei ban long ka backlog, ka dei ban long beit kaba thymmai, ka dei ban sdang thymmai beit”.
Nalor kane, u la ong ba ka seng ka la tyrwa ruh ban ai bhah beit ba mar 100 persen ha ka thungkam ïa ki Nonghikai jong ki skul Primary hapoh ka Jylla na ka bynta ki Khasi Jaiñtia ha Ri-lum Khasi Jaiñtia bad kumjuh ruh ïa ki Garo ha Ri-lum Garo.
“Ka jingai jingmut kaba khatduh ka long namar ba ngi ngeit ba ha ka pule puthi, ka bhah thungkam ruh ka don jingïadei bad ka long kaba kongsan ba haba ngi ai jinghikai sha ki khynnah ha ki skul Lower Primary bad Primary, ngi hap ban kren bad hikai ïa ki khynnah da la ki jong ki ktien lajong,” u la ong.
“Kumta ngi la ai jingmut ba ha Ri-lum Garo, 100 persen ka bhah ïa ki nonghikai ka dei ban leit sha ki Garo bad kumjuh ruh ha Ri-lum Khasi Jaiñtia, 100 persen ka bhah ka dei ban leit sha ki Khasi bad Jaiñtia. Ngi sngew ba ki Garo kin ym lah ban hikai ïa ki khynnah Khasi da ka Khasi lada ngi ïaid da ka 40:40 ne 50:40 lane ki Khasi kin leit sha Garo ban hikai da ka ktien Garo ïa ki Khynnah Garo. Na ka bynta ka jingjanai ha ka pule-dangle, ngi la ai jingmut ba kane ka 100 persen ka bhah ïa ki Nonghikai ha ki skul Lower Primary, Primary bad skul SSA” u la bynrap.
