Shillong, Risaw 03
Ki nongshong shnong jong lai tylli ki shnong kiba kynthup ïa ka Mawngap, Mawphlang bad Marbisu ki la pynpaw ïa ka jinglyngngoh ngaiñ halor ka jingsah khongreng jong ki pipe sam umbam-umdih na ka tnad sam um ka Sorkar Jylla lyngba ka skhim Jal Jeevan Mission (JJM) ha manla ki shnong bad ka jingsarang jong ki pipe ba la wan buh da ka tnad PHE kum shibynta ban wanrah ïa ka jingmyntoi ha kine ki thaiñ.
Kitei ki nongshong shnong ki la pynpaw ba kat haduh kine ki sngi ym shym la don kano-kano kaba la ai jingmyntoi ïa u paidbah hynrei ka la shu kylla long pynban kum ka jingpynwit ïa ki nongïaid-nongïeng bad haduh kat mynta ym pat shym la don satia uno-uno ruh u nongshong shnong ne ka longïing-longsem ka ban ïoh jingmyntoi lyngba kane ka skhim sam umbam-umdih hynrei la shu sahkut tang ha ka jingphah ap ne buhteng.
“La ar bnai pura ngi kum ki nongshong shnong ngi la ïai ap ïa ka jingpynbiang umbam-umdih napoh katei ka tnad hynrei haduh mynta ruh ym don dak eiei la ka dei hapoh ka shnong Mawngap, Mawphlang ne Marbisu ruh hynrei ka jingkyrduh um ka nang jur katba nang mih ki sngi”, ong ki nongshong shnong jong kitei ki laitylli ki shnong.
Shuh-shuh kitei ki nongshong shnong ki la ong ba kum ki paidbah haba ki ïohsngew ïa ka jingpyntrei kam ïa kata ka skhim JJM ne ka Jal Jeevan Mission, ki la dap da ka jingsngewkmen kaba khraw khamtam haba ki ïohi ba ka jingtrei ka la ïaid shaid-shaid namar kiba bun napdeng ki nongshong shnong ki dei kiba duk bad ki bym kotbor satia ban thied ïa ka um, hynrei kaba phylla ka long ba haduh mynta wat ki kor um kiba juh ïoh naduh mynshwa ruh ki nang la duna pynban.
Kumta, na ka liang ki nongshong shnong ki la kyrpad ïa ka Sorkar ba kan shimkhia lem mardor halor katei ka bynta ha shwa ba ki nongshong shnong jong kine lai tylli ki shnong kin mih sha surok ban pynpaw ïa ka jingeh jong ki namar ha ki por ba mynshwa kum kane ka jingkyrduh umbam-umdih kam ju da kham don koit ha kine lai tylli ki shnong hynrei mynta pat kane ka jingkyrduh umbam-umdih ka la long shaba palat bad ong ba haba jia kumne ïano yn kynnoh.
Kitei ki nongshong shnong ki la kyrpad ïa ka Sorkar ba kan phah da ki briew kiba lah ban pynïaid ïa ka kam ban ym don jingktah khamtam ïa u duk-u suk, u kup shiliang-sem shiliang ha kine ki thaiñ namar ong ba lada ki nongpeit ne ki heh kim lah ban pyntrei bha ïa ka kam, ka mut kane ka skhim kan dang sah kut sa kumba san ne shiphew snem eiei.
“Kumta, ngi ban jur ïa ka Sorkar ba kan shimkhia halor kane ka bynta namar ngi sah ha ka jaka jong ka tyllong um hynrei ngim don jingtong ban dih namar ïa ka kam bat jingtong la ai ha kiwei pat hynrei ma ki pat kim ai ha ka rukom kaba dei, kumta kan shem jingeh ïa ngi kum ki nongshong shnong”, la bynrap ki nongshong shnong.
