Jowai, Risaw 03
Ka Dorbar Shnong Loomsooiung Newhill, Jowai ha ka 2 tarik Risaw ka la khang tala ïa kawei ka ïing kaba la shu iehnoh khlem don nongpeit nongsumar bad kylla long ruh ka ktem jong ki nongleh kam sniew.
Kane ka ïing ka don hajan ka surok bah NH-6 hajan ka Challam Petrol Pump. U Waheh Shnong ka Loomsooiung u Ma Evermore Suchiang, u la ïathuh ba kane ka ïing ka la shah ieh ïing jah noh la bun snem bad na ka liang ka shnong ruh kam shym la tip mano ba dei trai ïa kane ka ïing.
Nalorkata u la pyntip ruh ba na ka liang ka tnat pulit jong ka district bunsien ka ju ïoh ban kem ïa ki ‘riew runar, ki nongtuh, nongdih drok kiba pyndonkam ïa kane ka ïing kum ka jaka riehtngen. Ka dorbar shnong ka la kyntu ïa kino-kino kiba dei trai ïa kane ka ïing ba kin wan ïakynduh ïa ki nongïalam shnong.
