Jowai, Risaw 03
Uwei u briew u la khlad noh hashen ha ka jingïatyngkhuh kali hapdeng ka trok bad ka Maruti Car kaba la jia ha ka step jong ka 3 tarik Risaw ha ka shnong Ialong hajan ka Jowai Civil Hospital, Ialong, West Jaiñtia Hills District.
Katkum ka khubor na ki pulit la ïathuh ba une u lanot ba la khlad la tip kyrteng kum u Bah Macmillan David Suchiang na ka shnong Shangpung Mission, West Jaiñtia Hills District.
Ïa ka trok kaba don ïa u registration number AS01-LC-5864 la ñiah da u Anilson War na Diengpasoh ha East Khasi Hills, katba ïa ka Maruti Car kaba don ïa u registration number ML05-G-8164 la ñiah da u Bah Macmillan.
Ka khubor kaba ïohlum la ïathuh ba kane ka maruti car ka dei kaba wan na ka thaiñ Shangpung katba ka trok ka wan na ka liang jong ka Jowai, hynrei ynda la poi ha katei ka jaka ki la ïatyngkhuh markhmat bad baroh ar tylli kali ki la poi shabar ka surok.
Ha kane ka jingïatyngkhuh, ka Maruti Car ka la julor phom na ka bynta shakhmat bad namar ka jingmynsaw jur u Bah Macmillan u la khlad noh hashen.
Na ka liang ki pulit ki la wan shimti noh ïa ka met jong utei u rangbah, katba na ka liang u nongñiah jong katei ka trok u la leit pyndem noh dalade hakhmat ki pulit ka Phramer Traffic Cell.
