Shillong, Risaw 03
U General Secretary ka BJP Meghalaya, Bah Wankitbok Pohshna u la pynrem bad kdew ba ki kynrum-kynram ha ka rukom thungkam-thungjam ha ka jylla khamtam ha ka kam ‘staff nurse’ ba dang shu pyllait shen ki kdew shai ïa ki jingdkoh ka Meghalaya Medical Services Recrui-tment Board (MMSRB) bad ka rukom pynmih ïa ka resol ka long thamula shisha.
Ha ka kyrwoh sha ki lad pathai khubor, u Bah Wankitbok u la ong, ka jingbym lah ban pynbna ïa ka resol ha ka por ba biang bad ka jingbym pyllait ïa ki kyrteng bad ki marks naduh basdang ka pyni ba don eiei sha lyndet bad kane ka ktah matïong ïa ka lawei ki khynnah samla bad kam long kaba bha ïa ka lawei ka jylla.
Da ki phew hajar ngut ki khynnah samla kiba thep kam ha ka jylla bad ki buh jingkyrmen ba ka rukom thungkam kan long kaba khuid bad suba bad kaba lait na ki dak ki shin jong ka thok bad shukor bad ki tnat kiba peit ïa ka thungkam-thungjam ha ka jylla kum ka MPSC ne MMSRB bad kiwei kiwei ki dei ban pyntikna ba ka rukom pynïaid eksamin ka dei ban long kaba adkar bad kaba lait na ki jingshukor. Lada don tang iwei i jingbakla ruh ka lam sha ka jingduh jingshaniah ïa ka rukom pynïaid baroh bad donkam ban hap ban long kiba husiar.
La ju ïohi na ka por sha ka por ba man ba ju pyllait ïa ka resol jong ki eksamin bapher-bapher ba pynlong ha ka jylla kin don beit ki kynrum-kynram kiba mih bad bun kim ju sngewhun ïa ki rukom ba ki tnat thungkam ki pyndonkam la ka rukom set jingkylli, ne ka rukom ban bniah ïa ki jubab ne wat ban pynmih ïa ka resol ba kine kiei baroh ki pyntharai sniew ïa ka sorkar ba don ha ka bor.
Bad lada ka sorkar kam lah ban pynbeit ïa ki kynrum-kynram ka don ka jingma kaba khraw kaba ap lypa ïa ka lawei ka jylla namar kiba dei hok ban ïoh ïa ka kam kim ïoh bad yn ïoh ban rung khlieh da ki briew ki bym don jingkitkhlieh eiei. Namar kata, ka BJP ka kyrpad ïa u Myntri Rangbah ka jylla ba un shimkhia bad tuklar halor kane ka phang bad pyntikna sha ki paidbah ka jylla ba kan ym don kano-kano ka jingleh buit-tuh na ka liang ki bor ba dei peit bad ka rukom pynïaid eksamin thungkam ha ka jylla ka dei ban long kaba khuid bad kaba lait na ki kynrum-kynram bad kaba lait na ka shah liang kaban pynmyntoi tang ïa ki katto-katne.
Dang shen ka ri ka la ïohi ïa ka jyrsieh thungkam kaba la jia ha ka jylla West Bengal bad kumno ka la ktah ïa ka jingim ki khynnah samla bad lada ka sorkar Meghalaya kam shimkhia kan sa wan jia biang hangne kumjuh kumba la jia ha ki snem mynshwa. La pynkut ka kyrwoh khubor.
