Shillong, Risaw 03
Ka Meghalaya Medical Services Recruitment Board (MMSRB) mynta ka sngi ka 3 tarik Nailur 2024 ka la pynshai paidbah ha kaba ïadei bad ki khubor kiba la mih ha ki rynsan ‘social media’ halor ka jingbym hun bad thurmur ka rukom pynmih ïa ki resol jong ki Staff Nurse bad ki ANM ha ka jylla ba la pynmih ha ka 21 tarik u Nailar 2024.
Haba kren sha ki nongthoh khubor mynta ka sngi na ka liang ka Secretary jong ka Meghalaya Medical Services Recruitment Board (MMSRB) ka Dr L Mylliemumlong ka la ong ba MMSRB ka la ïohpdiang ïa shibun ki jingshah kynthoh naduh ka jingbym biang ka rukom pynïaid ïa ka jingthungkam bad ruh ka jingkynnoh ba ki don ki roll number jong kiba thepkam kiba khlem wan thoh hynrei ki mih kyrteng ha ka resol kaba la pynmih da ka MMSRB. Ha kaba ïadei bad kine na ka liang ka Board ka la kyntait ïa baroh ki jingkynnoh ki bym ïahap bad shong nia.
Na ka liang ka Dr Mylliemumlong ka la ïathuh ruh hadien ba la ïohpdiang ïa ki nongthep kam kiba haduh 5603 tylli ki form na ka bynta ka kam Staff Nurse, 706 tylli ki application form na ka bynta ki ANM bad hadien ka jingpeit bniah ïa ki jingdonkam baroh la pyllait ban shim ïa ki Admit Card kaba ki nongthepkam ki lah ban download na ka website jong ka board. Ka Dr Mylliemumlong ka la pyntip kumba ka long mynta kam don ka jingpynlong ïa ka jingpeit bniah ïa ki kot ha shwa ban pynlong ïa ka written eksamin da kaba bud ïa ka Office Memorandum kaba kdew shai ba yn lah ban peit ïa ki kot jong kiba thep kam tang hadien ba ki la pass ïa ka written examination.
Ka la pyntip ruh ba ka MMRSB ka la jied haduh 495 ngut na ka bynta ki staff nurse bad 263 ngut na ka bynta ki ANM katkum ka jinglehbha jong ki ha ka eksamin. Kane ka jingjied ïa ki briew ka la long lai shah palat ïa ka jingdon jong ki kam ba lait bad la ong ba don ki bym lah ban pynbiang ïa ki kot ki sla kiba donkam kum ka Meghalaya Nursing Council Registration bad dei halor kane ka nongrim na ka liang ka board ka kwah noh ban pyndap ïa ki kam kiba lait khlem da pynsahteng hynrei ki la don ki jingkynnoh ba ïa ka thup kyrteng khlem shym la jied ne leh katkum ka Reservation. Kumta ha kaba ïadei bad kane na ka liang ka Board ka la shong biang bad peit bniah ïa ki marks kiba ïoh da kiba ïaleh ïa ka eksamin na ka bynta ka kam nos hynrei wat la katta ruh ka dang don ka jingbymhun ha kaba ki la don ki seng kiba leit ïakynduh ïa ka Myntri ba dei peit bad na ka liang ka board ka la rai ban pynmih paidbah ïa ki marks jong kiba ïaleh eksamin katkum ka thup bad ki nongthep kam ki lah ban ujor halor ki jingbymhun ïa ka rukom pynmih result jong ka MMRSB.
Nalor ka Secretary, ha kane ka sngi la ïadonlang ruh i DHS (MI) Dr F.V Kharshiing, I.M Marbaniang Deputy Director Nursing, Dr Twinkle S.R Marak bad kiwei kiwei.
