Shillong, Risaw 03
Ka Fraternity Art Cine Entertainment Shillong ka la pynpaw ïa ka jingsngew-nguh kaba khraw ïa ka tnad jingpyntip bad jingpynbna, ka Sorkar India, kaba la plie lad-plie lynti ïa ki nongshna phlim na ki Jylla jong ka thaiñ shatei lam-mihngi ka Ri ban ïashim bynta ha ka tamasa phlim ba pawnam jong ka Busan International Film Festival, 2024.
Kum shi bynta jong kane ka jingthmu, yn jied ar ngut ki nongshna phlim na kawei-pa-kawei ka Jylla ka thaiñ shatei lammihngi ban leit sha katei ka tamasa, kaba la buh ban long naduh ka 2 tarik u Risaw haduh ka 11 tarik u Risaw 2024, ka ban sa long ha Busan, South Korea.
Ka tnad pyntip ka Sorkar Jylla, ka Directorate of Information and Public Relations (DIPR), ka la ai jingmut ïa ki ar ngut ki nongshna phlim kiba don sap na kane ka Jylla kiba kynthup ïa ka Kong Simi Khongtiang na Rilum Jaiñtia bad Elvachisa Sangma na Tura.
Ka Kong Simi Khongtiang ka dei ka nongshna phlim kaba tbit ïa kaba la ithuh na ka bynta ki jingnoh synñiang jong ka sha ka phlim ha ka thaiñ, katba ka Elvachisa Sangma ka dei ka nongshna phlim kaba la ïoh ïa ka khusnam bad kaba la ïoh ruh ïa ka jingithuh ha ki rynsan ba pawnam kum ha ka Mumbai International Film Festival (MIFF).
Ka tnad jingpyntip bad jingpynbna ka Sorkar India, ka la ai kam ïa kawei-pa-kawei ka Jylla jong ka thaiñ shatei lammihngi ban jied ïa ki ar ngut ki nongmihkhmat-uwei u nongshna phlim bad uwei u nongïoh khusnam na ki tamasa phlim bapawkhmat kum na ka National Film Awards (NFA), ka International Film Festival (IFFI), lane na ka Mumbai International Film Festival (MIFF). Ïa ka rai ba khatduh la jied bad aiti ha ka 25 tarik u Nailur 2024, kaba pynthikna ïa ka jingpynpaw pyrthei kaba jylliew jong ki nongshna phlim jong ka thaiñ shatei lammihngi ha ka tamasa.
Kum ka jingkyrshan ïa kane ka kynhun, ka National Film Development Corporation (NFDC) kan kynthup ïa baroh ki jinglut-jingsep kynthup ïa ka bai liengsuiñ bad ka bai sah na ka bynta san sngi ha ka por ba pynlong ïa ka tamasa khlem da kynthup ïa ki sngi leit jingleit.
Ka Fraternity Art Cine Entertainment ka la ai jingïaroh ïa ka jingpyrshang jong ka tnad, da kaba khot ïa ka kum ka jingthmu kaba kongsan bha ban kyntiew ïa ki nongshna phlim na ka thaiñ shatei lammihngi bad kaba la ïarap ruh ïa ki ban ïoh ïa ka jingshai bad ka jingpaw sha ka pyrthei.
Ka jingshim bynta ha ka tamasa phlim jong ka Busan International Film Festival kan ai ïa ka rynsan kaba kyrpang na ka bynta kine ki nongshna phlim ban pyni ïa la ki sap ha ka pyrthei, ban pynroi ïa ki jingkylla jingmut bad ki jingïatreilang.
Kane ka jingkyrshan na ka tnad ka pyni ïa ka jingangnud jong ka Sorkar ban kyntiew bad ka jingpynroi ïa ka pateng ba riewspah jong ki jylla shatei lammihngi ka Ri, da kaba ailad ïa ki nongshna phlim ha ka thaiñ ïa ka lad ban ïoh ïa ka jingithuh ha ka pyrthei.
Ka tamasa phlim jong ka pyrthei ne ka Busan International Film Festival kaba dei kawei na ki tamasa phlim ba pawnam tam ha Asia, kan plie lad ïa ki nongshna phlim kum ïa la kong Simi Khongtiang bad ka Elvachisa Sangma, ha ryngkat bad kiwei kiwei ki nongshna phlim na kane ka thaiñ ïa ka lad ban pynpaw ïa ka jingpher bad ka jingtbit bathymmai jong ki phlim kiba pynmih napoh ka thaiñ shatei lammihngi sha ka ki nongsngap ha ka pyrthei baroh kawei.
